Amerika ,Yaxın Şərq
Dünya iqtisadiyyatında durğunluq başa çata bilər - AÇIQLAMA
ABŞ və İran arasında nüvə proqramı ilə bağlı danışıqlar yenidən beynəlxalq gündəmin əsas mövzularından birinə çevrilib. Vaşinqton və Tehran arasında illərdir davam edən fikir ayrılıqlarına baxmayaraq, tərəflərin mümkün razılaşmaya yaxınlaşdığına dair açıqlamalar diqqət çəkir. ABŞ Prezidenti Donald Trampın nüvə sazişinin imzalanmasına az qaldığını bildirməsi Yaxın Şərqdə təhlükəsizlik, sanksiyalar və regional güc balansı ilə bağlı yeni gözləntilər formalaşdırıb.
Birinci növbədə ABŞ-İran arasında mümkün saziş geosiyasi baxımdan Yaxın Şərqdəki durumu dəyişəcək. Politoloq Ramiyə Məmmədova Crossmedia.az-a açıqlamasında bildirib ki, belə bir razılaşma Körfəz ölkələrinə və regiondakı digər dövlətlərə həm iqtisadi, həm siyasi, həm də regional sabitlik gətirəcək.
“Müharibənin dayanması və vəziyyətin normallaşması bu gün Yaxın Şərq ölkələri üçün ən vacib məsələdir”, – deyə ekspert qeyd edib.
Ramiyə Məmmədovanın sözlərinə görə, nüvə silahının azaldılması ilə bağlı müqavilə bağlanarsa, ABŞ İranla tez razılaşmağa müsbət yanaşacaq. Lakin hazırda İran bu məsələdə güzəştə getmək istəmir və nüvə silahının olmadığını bəyan edir.
Ekspert vurğulayıb ki, əgər saziş imzalanarsa, ABŞ-in regiondakı təsiri zəifləyə, İranın isə tərəfdaşları ilə fəaliyyəti və ümumi gücü arta bilər. Sanksiyaların yüngülləşdirilməsi və digər tələblər İran iqtisadiyyatına əlavə stimul verəcək.
Digər tərəfdən, saziş Körfəz ölkələrinin investisiyaları üçün təhlükəsizlik zəmanəti yaradacaq. Gələcək iqtisadi layihələr və sərmayələrin rahat şəkildə həyata keçirilməsi bu müqavilə ilə tənzimlənəcək.
Politoloqun fikrincə, Türkiyə bu prosesdə ərəb dövlətləri ilə birlikdə öncül mövqedədir. NATO üzvü olan Türkiyə üçün saziş Yaxın Şərqdəki təsir və təhlükəsizlik təminatını gücləndirəcək.
“Bu da öz növbəsində dünya iqtisadiyyatında sabitləşməyə və qlobal təlatümlərin azalmasına gətirib çıxara bilər. Eyni zamanda, logistika və Körfəz təhlükəsizliyi məsələləri də gündəmə gələcək”, – deyə Ramiyə Məmmədova yekunlaşdırıb.
Nigar Xəlilli
18:42 08.06.2026
Oxunuş sayı: 49
