Rusiya Azərbaycanla münasibətləri inkişaf etdirməyə çalışır: "Gün haradan çıxıb?"
Bu barədə Rusiya xarici işlər nazirinin müavini Mixail Qaluzin Sankt-Peterburq Beynəlxalq İqtisadi Forumu çərçivəsində Azərbaycanla münasibətlər barədə də danışıb.
O bildirib ki, Rusiya prinsipial olaraq Azərbaycanla münasibətlərin hərtərəfli inkişafına hədəflənib və tərəflər arasında qarşılıqlı əməkdaşlığın davam etdirilməsi vacib hesab olunur.
İndiki həssas məqamda Qaluzinin səsləndirdiyi fikirlər Bakı - Moskva münasibətlərinin xüsusilə "enişli- yoxuşlu" olması baxımından diqqət çəkir.
Məsələ ilə bağlı Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Crossmedia.az-la öz fikirlərini bölüşüb: "Azərbaycanın xarici siyasəti bütün qonşu dövlətlərlə normal və qarşılıqlı hörmətə əsaslanan münasibətlərin qurulmasına yönəlib. Bu baxımdan Rusiya da istisna deyil. Təəssüf ki, bir il əvvəl baş vermiş faciəvi təyyarə hadisəsi- Azərbaycan təyyarəsinin vurulması iki ölkə arasındakı münasibətlərə ciddi təsir göstərdi və müəyyən gərginlik yaratdı. Lakin Azərbaycan siyasi rəhbərliyi və Rusiya tərəfinin atdığı addımlar nəticəsində məsələ müəyyən mənada öz həllini tapdı. Bizim üçün vacib məqamlardan biri də Rusiyada yaşayan Azərbaycan icmasının vəziyyəti və onların normal fəaliyyət göstərməsidir. Hər bir halda, Rusiya böyük və region üçün əhəmiyyətli dövlətdir. Buna görə də Azərbaycan-Rusiya münasibətlərinin normal məcrada inkişaf etməsi və qarşılıqlı maraqlar əsasında qurulması hər iki tərəfin mənafeyinə uyğundur".
Elmir Heydərli
16:28 05.06.2026
Oxunuş sayı: 60
