Xarici xəbərlər

ABŞ Dövlət Departamenti: İranın ən yaxşı fəsli hələ qarşıdadır

ABŞ Dövlət Departamenti İran xalqına ünvanlanmış videomüraciət yayımlayıb.

Crossmedia.az bu barədə xarici mediaya istinadən xəbər verir.

Müraciətdə qeyd olunub ki, amerikalılar İrana baxdıqda minilliklərə söykənən tarixə, zəngin mədəniyyətə və böyük potensiala malik bir xalq görürlər. Videoda İran vətəndaşlarının sabitlik, söz azadlığı və qorxu olmadan yaşamaq kimi fundamental dəyərlərə sahib olduqları vurğulanıb.

Dövlət Departamenti İranın tarixi nailiyyətlərini və xalqının uğurlarını sadalayaraq bildirib ki, problemin mənbəyi İran xalqı deyil, əməkdaşlıq əvəzinə qarşıdurma siyasətini seçən mövcud hakimiyyətdir.

Videomüraciətdə “İranı geri salan nədir?” sualı səsləndirilərək, ölkənin üzləşdiyi çətinliklərin səbəbinin xalq deyil, idarəetmə siyasəti olduğu mesajı verilib.

ABŞ tərəfi İranın gələcəyinin məhz xalq tərəfindən müəyyənləşdirilməli olduğunu qeyd edib. Müraciətin sonunda isə “İranın hekayəsi hələ də yazılır. Onun ən yaxşı fəsli hələ qarşıdadır” ifadəsinə yer verilib.

🖨 Çap et

14:43 05.06.2026

Oxunuş sayı: 50