Xarici xəbərlər
Ermənistanda sorğu: hakim partiya üstünlüyünü itirə bilər, koalisiya ehtimalı artır
Ermənistanda keçirilən yeni sosioloji sorğunun nəticələrinə görə, hakim “Vətəndaş Müqaviləsi” partiyası öndə olmağa davam etsə də, artıq təkbaşına hökumət formalaşdırmaq üçün üstünlüyünü itirə bilər.
Crossmedia.az xəbər verir ki, 1–3 iyun tarixlərində telefon sorğusu (CATI metodu) ilə aparılan araşdırmada seçkilərdə iştirak etməyə hazır olduğunu bildirən respondentlər arasında “Vətəndaş Müqaviləsi” partiyası 29,6%, əsas rəqibi “Güclü Ermənistan” bloku isə 26,4% səs toplayıb.
Sorğunu aparanların qiymətləndirməsinə görə, bu kiçik fərq seçki kampaniyası zamanı siyasi balansı dəyişə bilər.
Araşdırmada 2050 nəfər iştirak edib, statistik xəta ±2,2% təşkil edib. Seçici fəallığının 55% olacağı, respondentlərin 45%-nin isə cavab verməkdən imtina etdiyi qeyd olunub.
Hesabatda qeyd olunur ki, hakim partiya artıq parlamentdə təkbaşına üstünlük qura bilməyə bilər və bu, koalisiya hökuməti ehtimalını artırır.
Eyni zamanda “Güclü Ermənistan” blokunun nəticələri güclü rəqabətin formalaşdığını göstərir. Analitiklər bildirirlər ki, müxalifətin səfərbərliyi siyasi güc balansını dəyişə bilər.
Proqnozlara görə, gələcək parlamentdə ən azı beş siyasi qüvvənin təmsil olunması gözlənilir ki, bu da kiçik partiyaların hökumətin formalaşmasında həlledici rol oynamasına səbəb ola bilər.
12:33 05.06.2026
Oxunuş sayı: 59
