Xarici xəbərlər

Albaniyada ada qalmaqalı: 1,5 milyard dollarlıq iddia ölkəni qarışdırdı

Albaniyada “Zverneci” adasının satışı ilə bağlı iddialar fonunda kütləvi etirazlar artıq beş gündür davam edir.

Crossmedia.az xarici mediaya istinadən xəbər verir ki, etirazlar ölkə vətəndaşlarının Baş nazir Edi Ramanın ABŞ-li iş adamları ilə böyük məbləğli bir razılaşma imzaladığı barədə məlumatlardan sonra başlayıb.

Məlumata görə, sözügedən razılaşma 1,5 milyard ABŞ dollarından çox dəyərə malikdir və layihədə ABŞ Prezidenti Donald Trampın kürəkəni Cared Kuşner və qızı İvanka Tramp ilə əlaqəli şirkətlərin adları çəkilir. İddialara əsasən, həmin ərazidə yüksək gəlirli turistlər üçün kurort inşa olunması planlaşdırılır.

Etirazçılar bildirirlər ki, müqavilə parlament prosedurlarından kənar şəkildə həyata keçirilib. Onların narahatlığına görə, “Zverneci” adası rəsmi olaraq qorunan təbiət qoruğudur və burada nadir quş və dəniz canlıları, həmçinin sərv meşələri və Bizans dövrünə aid tarixi monastır yerləşir.

Bəzi nümayişçilər isə ölkədə ABŞ və İsrail təsirinin artmasından narahat olduqlarını bildirir və bu prosesin Alban ərazilərinin xarici şirkətlər tərəfindən alınmasına yol aça biləcəyini iddia edirlər.

Edi Rama isə yayılan məlumatları təkzib edərək, adanın satışının gündəmdə olmadığını, yalnız ətraf mühitin qorunması şərti ilə məhdud müzakirələrin aparıldığını bildirib. Buna baxmayaraq, adanın bəzi hissələrinin hasara alındığı və polis tərəfindən etirazçıların əraziyə girişinin məhdudlaşdırıldığı qeyd olunur.

🖨 Çap et

18:48 04.06.2026

Oxunuş sayı: 45