Bərpaolunan enerjiyə maraq artır- Səbəblər açıqlandı
Dünyada baş verən geosiyasi proseslər və enerji bazarlarında müşahidə olunan dalğalanmalar enerji təhlükəsizliyi məsələsini yenidən qlobal gündəliyin əsas mövzularından birinə çevirib. Bu şəraitdə ölkələrin yerli resurslara əsaslanan, etibarlı və əlçatan enerji mənbələrinə üstünlük verməsi strateji zərurət kimi qiymətləndirilir.
Bunu Bakı Enerji Həftəsində çıxışı zamanı Beynəlxalq Bərpaolunan Enerji Agentliyinin (IRENA) Baş direktoru Françesko La Kamera bildirib. O qeyd edib ki, müasir dünyanın üzləşdiyi enerji böhranı əvvəlki dövrlərdən fərqlənir və köhnə yanaşmalar artıq tam effektiv nəticə vermir. Onun sözlərinə görə, hökumətlər və sənaye qurumları qeyri-müəyyən qlobal şəraitdə rəqabət qabiliyyətini qorumaq üçün bərpaolunan enerji mənbələrinə keçidi sürətləndirməli və yeni enerji sisteminin formalaşmasına hazır olmalıdırlar.
Məsələ ilə bağlı iqtisadçı- ekspert Eldəniz Əmirov Crossmedia.az-la öz fikirlərini bölüşüb: "Bərpaolunan enerjinin iqtisadi baxımdan mühüm üstünlüklərə malik olması onun perspektivlərini daha da cəlbedici edir. Çünki həm günəş, həm də külək enerjisinin istehsalı ilə bağlı maya dəyəri son illərdə əhəmiyyətli dərəcədə azalıb. Bir çox ölkələr bu enerji mənbələrindən istifadə etməklə daha aşağı xərclərlə elektrik enerjisi istehsal edə bilir. Müasir texnologiyaların tətbiqi nəticəsində isə istehsal və istismar xərcləri minimum səviyyəyə enir. Eyni zamanda, bərpaolunan enerji resursları dünyanın demək olar ki, bütün ölkələrində mövcuddur. Sadəcə bəzi ölkələrdə bu potensial daha yüksək, digərlərində isə nisbətən aşağıdır. Məhz buna görə də bərpaolunan enerji mənbələrinin inkişafı ölkələrin enerji təhlükəsizliyinin gücləndirilməsində mühüm rol oynayır, onların enerji idxalından asılılığını əhəmiyyətli dərəcədə azaldır. Bununla yanaşı, bərpaolunan enerji sektoru investisiyaların cəlb edilməsi üçün əlverişli şərait yaradır. Bu sahəyə yatırılan sərmayələr yalnız enerji istehsalını artırmır, həm də yeni iş yerlərinin açılmasına, şəbəkə infrastrukturunun modernləşdirilməsinə və digər əlaqəli sahələrin inkişafına təkan verir. Beləliklə, bərpaolunan enerji iqtisadiyyat üçün geniş multiplikativ effekt formalaşdıraraq davamlı inkişafın vacib amillərindən birinə çevrilir".
Elmir Heydərli
11:19 03.06.2026
Oxunuş sayı: 48
