Azərbaycanda strateji investisiya layihələri ilə bağlı komissiya yaradılıb
Nazirlər Kabineti strateji investisiya layihələrinin sürətləndirilmiş qaydada icrasının təmin edilməsi və qurumlararası əlaqələndirmənin gücləndirilməsi məqsədilə Komissiyanın yaradılması haqqında sərəncam verib.
Crossmedia.az xəbər verir ki, sərəncamı Baş nazir Əli Əsədov imzalayıb.
Qərara əsasən, Komissiyanın sədri Baş nazirin müavini Şahin Mustafayev, sədr müavini iqtisadiyyat naziri Mikayıl Cabbarov, üzvləri isə maliyyə nazirinin müavini, iqtisadiyyat nazirinin müavini, ekologiya və təbii sərvətlər nazirinin müavini, energetika nazirinin müavini, ədliyyə nazirinin müavini, əmək və əhalinin sosial müdafiəsi nazirinin müavini, fövqəladə hallar nazirinin müavini, kənd təsərrüfatı nazirinin müavini, rəqəmsal inkişaf və nəqliyyat nazirinin müavini, Dövlət Gömrük Komitəsi sədrinin müavini, Dövlət Şəhərsalma və Arxitektura Komitəsi sədrinin müavini və Azərbaycan Mərkəzi Bankının sədr müavinidir.
Komissiyanın cari fəaliyyətinin təşkili məqsədilə Komissiyanın Katibliyi yaradılıb və Katibliyin funksiyasının həyata keçirilməsi İqtisadiyyat
Nazirliyinə həvalə edilib.
Komissiya nazirliyin apardığı ilkin qiymətləndirmənin nəticələrinə əsasən təqdim olunan strateji investisiya layihələrinə
baxılmasını və seçilməsini həyata keçirməli, seçilmiş strateji investisiya layihələrinin siyahısını illik əsasda təsdiq edilməsi üçün
Nazirlər Kabinetinə təqdim etməli, strateji investisiya layihələrinin icrası zamanı aidiyyəti qurumlar arasında əlaqələndirməni, yaranan institusional, inzibati, texniki və digər maneələrin operativ olaraq aradan qaldırılması üçün lazımi tədbirlərin görülməsini təmin etməli, strateji investisiya layihələrinin icrası ilə əlaqədar müvafiq təşviq tədbirləri, güzəşt mexanizmləri, infrastruktur dəstəyi, torpaq sahələrinin ayrılması, dövlət zəmanəti, subsidiya barədə və digər təkliflərini Nazirlər Kabinetinə təqdim etməli, ildə iki dəfə strateji investisiya layihələrinin icrası ilə bağlı məlumatı Nazirlər Kabinetinə təqdim etməlidir.
Müzakirə olunan strateji investisiya layihələrinin fəaliyyət istiqamətindən asılı olaraq, zəruri hallarda Komissiyanın üzvü olmayan digər dövlət orqanları (qurumları) Komissiyanın işinə cəlb oluna bilərlər.
Sərəncam imzalandığı gündən qüvvəyə minir.
10:48 02.06.2026
Oxunuş sayı: 54
