Azərbaycanın yaşıl enerji strategiyası – ölkə 2030-da nəyə hazırlaşır?
Son illərdə Azərbaycanda enerji siyasətinin əsas prioritet istiqamətlərindən biri alternativ və bərpa olunan enerji mənbələrinin inkişafıdır.
Ölkənin günəş, külək və hidroenerji potensialı bu sahədə geniş imkanlar yaradır və artıq bir sıra iri layihələr mərhələli şəkildə icra olunmaqdadır.
Rəsmi Bakı yaşıl enerji strategiyası çərçivəsində həm daxili enerji təminatını gücləndirməyi, həm də ixrac imkanlarını genişləndirməyi hədəfləyir.
Bəs bu sahədə hazırkı investisiyalar hansı mərhələdədir, Azərbaycanın alternativ enerji potensialı nə qədər real iqtisadi dividentlər vəd edir?
Mövzu ilə bağlı iqtisadçı Fuad İbrahimov Crossmedia.az-a açıqlama verib:
“Artıq investisiyalar konkret şəkildə qoyulub. Bu baxımdan, qeyd etmək lazımdır ki, istər külək enerjisi, istər günəş enerjisi, istərsə də hidroenerji istiqamətində ölkəmizin kifayət qədər böyük potensialı var.
Bu sahə xarici investorlar üçün də olduqca maraqlıdır. Hökumətin konkret proqramları və dövlət strategiyası mövcuddur. Bu strategiyaya əsasən, müəyyən illər çərçivəsində elektrik enerjisi bazasının mərhələli şəkildə yaşıl enerji ilə əvəz olunması planlaşdırılır.
Onu da qeyd edək ki, təxminən iki il bundan əvvəl Azərbaycanla Avropa İttifaqı arasında bir sıra memorandumlar imzalanıb. Bu sənədlərdə əsasən ixrac potensialının artırılması və alternativ enerji resurslarının dəyərləndirilməsi məsələləri yer alıb. Hazırda texniki-iqtisadi əsaslandırmalar aparılır və Qara dənizin dibi ilə yaşıl enerjinin ixracı istiqamətində müxtəlif imkanlar araşdırılır”.
İqtisadçı əlavə edib ki, bu istiqamətdə işlər davam edir və aparılan tədqiqatlar nəticəsində həm potensial, həm də güc göstəriciləri yenidən qiymətləndirilir:
“Daha geniş imkanların müəyyən olunması prosesi də paralel şəkildə gedir. Faktiki olaraq, günəş, külək və su enerjisi sahəsində layihələr artıq icradadır.
Xüsusilə, işğaldan azad olunmuş ərazilərdə bir sıra su elektrik stansiyaları istifadəyə verilib və bu layihələr real icra mexanizmi olan konkret addımlardır. Ümumilikdə ölkəmizin bu sahədə kifayət qədər böyük potensialı var.
Proqnozlara görə, 2030-cu ilə qədər enerji istehlakımızın təxminən 30 faizi alternativ enerji mənbələri hesabına təmin edilə bilər. Lakin burada əsas məsələ infrastrukturun bu keçidə uyğunlaşdırılmasıdır.
Bu proses mərhələli şəkildə həyata keçirilir və planlaşdırmaya uyğun olaraq 2030-cu ilədək elektrik enerjisi istehsalının təxminən üçdə birinin alternativ enerji mənbələri hesabına təmin olunması hədəflənir.
Eyni zamanda, ixrac potensialının da artacağı gözlənilir. Düşünürəm ki, Azərbaycanın iqtisadi baxımdan gəlir mənbələri sırasında alternativ enerji sahəsi də mühüm və əsaslı yer tutacaq”.
Ayhan
15:15 01.06.2026
Oxunuş sayı: 48
