Niger Müdafiə Nazirliyi: Burkina Faso sərhədində baş verən hücumlarda 39 nəfər həlak olub
Nigerin qərbində, Burkina Faso sərhədində yerləşən Libiri və Kokorou icmalarında iki ayrı hücum nəticəsində 39 nəfər öldürülüb. Crossmedia.az France24-ə istinadən bildirir ki, Niger Müdafiə Nazirliyinin məlumatına görə, hücumlar dekabrın 12-dən 14-dək olan müddətdə baş verib.
Hücum nəticəsində Libiridə 21, Kokorouda isə 18 nəfər, o cümlədən uşaqlar həlak olub. Nazirlik bu hücumları “barbar aktlar” adlandırıb və müdafiəsiz mülki əhalinin hədəf alındığını bildirib.
Sözügedən bölgə, İŞİD və Əl-Qaidə ilə əlaqəli silahlı qruplaşmaların fəaliyyət göstərdiyi bir ərazidir. Son günlərdə Tera sərhəd bölgəsində qanlı hücumların artdığı qeyd edilir.
Qeyd edək ki, Niger hökuməti dekabrın 7-də mal daşıma karvanına edilən hücumda 21 nəfərin öldüyünü təsdiqləmişdi. Bununla yanaşı, Tera bölgəsində baş verən digər hücumlarda 90-dan çox əsgər və 40-dan artıq mülki şəxsin həlak olduğu barədə xəbərlər yayılsa da, Niger hərbi hökuməti bu iddiaları rədd edib.
Gültac Mehdizadə
13:01 15.12.2024
Oxunuş sayı: 3929
