İran ABŞ-yə 5 şərt irəli sürdü – Vaşinqton qəbul edəcəkmi?
“Fars” agentliyinin yaydığı məlumata görə, İran danışıqların bərpası üçün ABŞ qarşısında beş əsas şərt irəli sürüb. Bu şərtlər sırasında Livan başda olmaqla bütün cəbhələrdə müharibənin dayandırılması, İrana qarşı tətbiq olunan sanksiyaların ləğvi, dondurulmuş İran vəsaitlərinin azad edilməsi, müharibənin vurduğu zərərin kompensasiya olunması və Tehran rəhbərliyinin Hörmüz boğazı üzərində suverenlik hüququnun tanınması yer alır.
Lakin mövcud geosiyasi reallıqlar fonunda bu tələblərin ABŞ tərəfindən tam şəkildə qəbul olunacağı inandırıcı görünmür. Vaşinqton xüsusilə İranın nüvə proqramı, regional təsir imkanları və Hörmüz boğazındakı nəzarət məsələsində daha sərt mövqe nümayiş etdirir.
Bu baxımdan, tərəflər arasında danışıqların yenidən başlaması mümkün sayılsa da, İranın irəli sürdüyü şərtlərin ABŞ tərəfindən olduğu kimi qəbul edilməsi ehtimalı olduqca aşağı qiymətləndirilir.
Mövzu ilə bağlı politoloq Oqtay Qasımov Crossmedia.az-a açıqlama verib:
"İranın irəli sürdüyü şərtlərin ABŞ tərəfindən qəbul ediləcəyi gözlənilən deyil. Çünki bunlar kifayət qədər maksimalist tələblərdir və ABŞ tərəfindən qəbul olunması real görünmür. Hazırkı mərhələdə Amerika Birləşmiş Ştatları İrandan əsasən iki mühüm məsələni tələb edir.
Birincisi, Hörmüz boğazının açıq saxlanılması, sərbəst gəmiçiliyin və dəniz nəqliyyatının təhlükəsiz hərəkətinin təmin olunmasıdır.
İkincisi isə İranın nüvə proqramı ilə bağlı razılaşmanın əldə edilməsidir. ABŞ İran tərəfinə 20 il müddətində nüvə proqramına moratorium tətbiq olunmasını, həmçinin 440 kiloqram zənginləşdirilmiş uranın ölkə xaricinə çıxarılmasının təmin edilməsini təklif edir.
Bu baxımdan, İran tərəfinin irəli sürdüyü tələblərin ABŞ tərəfindən qəbul olunması demək olar ki, mümkünsüz görünür”.
Ayhan
12:15 13.05.2026
Oxunuş sayı: 57
