Fərdi istilik sistemlərinə qadağa tikinti bazarına necə təsir edəcək?
Son dövrlərdə mənzil tikintisi sahəsində tətbiq edilən yeni tənzimləmələr bazarın gələcək istiqamətinə birbaşa təsir göstərməkdədir.
Xüsusilə, Nazirlər Kabineti tərəfindən qəbul edilən qərara əsasən, çoxmənzilli yaşayış binalarında fərdi istilik sistemlərinin quraşdırılmasına məhdudiyyətin tətbiqi tikinti sektorunda yeni yanaşmanın formalaşdığını göstərir.
Bu addım bir tərəfdən enerji səmərəliliyinin artırılması və ekoloji tarazlığın qorunması məqsədi daşısa da, digər tərəfdən tikinti xərclərinə və dolayısı ilə mənzil qiymətlərinə mümkün təsiri ilə bağlı müzakirələri aktuallaşdırır.
Mövzu ilə bağlı əmlak eksperti Ramil Osmanlı Crossmedia.az-a açıqlama verib:
“Bu mövzu son günlərin ən aktual məsələlərindən biridir. Hesab edirəm ki, qərar bir qədər gecikmiş olsa da, alqışa layiqdir. Çünki bu addım ölkədə ekoloji tarazlığın təmin olunması ilə yanaşı, ümumilikdə mənzil tikintisi sistemində yeni bir mərhələnin başlanğıcı kimi də qiymətləndirilə bilər.
İlk mərhələdə mövcud infrastrukturu nəzərə alsaq, təbii ki, bu yenilik tikinti şirkətləri üçün əlavə xərclər deməkdir. Buraya mərkəzləşdirilmiş istilik sistemlərinin qurulması, tətbiqi və gələcəkdə həmin sistemlərin əsas istilik şəbəkələrinə qoşulması daxildir.
Eyni zamanda, “Azəristiliktəchizat” və ya bu sahədə fəaliyyət göstərən digər qurumlarla koordinasiyalı əməkdaşlıq, texniki şərtlərin alınması kimi məsələlər də əlavə xərc yaradan amillər sırasındadır.
Bu baxımdan, prosesin ilkin mərhələsində xərclərin müəyyən qədər artması qaçılmazdır və bu, müəyyən dərəcədə mənzil qiymətlərinə də təsir göstərə bilər”.
Ekspert qeyd edib ki, uzunmüddətli perspektivdə hesab edirəm ki, bu proses özünü doğruldacaq:
“Azərbaycanda bu sahə üzrə infrastruktur tam formalaşdıqdan sonra, mərkəzləşdirilmiş istilik sistemi mənzil tikintisinin ayrılmaz hissəsinə çevriləcək.
Necə ki, bu gün binalarda qaz və elektrik təchizatı standart bir tələb kimi qəbul olunur, gələcəkdə istilik təchizatı da eyni səviyyədə zəruri komponent olacaq.
Nəticə etibarilə, bu istiqamət artıq kommunal təsərrüfat sisteminin əsas elementlərindən biri kimi formalaşacaq və ümumi xərc strukturunda nəzərə alınmaqla, bir kvadratmetr mənzilin qiymətinə ciddi təsir göstərməyəcək”.
Ayhan
16:53 29.04.2026
Oxunuş sayı: 44
