Həzi Aslanov stansiyasında yaranan problem nədən qaynaqlanır? - Bakı Metropoliteni və memardan açıqlama
Bakı Metropoliteninin Həzi Aslanov stansiyasında müşahidə edilən mənzərə paytaxtın nəqliyyat infrastrukturunun texniki vəziyyəti ilə bağlı ciddi suallar doğurur.
Xüsusilə, metro platformasının interyerində nəzərə çarpan su sızmaları, divarlarda əmələ gəlmiş izlər və üzlük materiallarının deformasiyası bu obyektlərdə uzun müddətdir davam edən problemlərin mövcudluğunu açıq şəkildə göstərir.
Bu cür hallar yalnız estetik qüsur deyil, həm də mühəndis-kommunikasiya sistemlərinin dayanıqlılığı baxımından narahatedici siqnaldır.
Müşahidələr göstərir ki, problemin kökü epizodik deyil, sistemli xarakter daşıyır və ehtimal ki, tikinti və ya sonrakı texniki xidmət mərhələlərində yol verilmiş nöqsanlarla bağlıdır.
Nəticə etibarilə, suyun konstruksiyaya nüfuz etməsi elektrik sistemlərinə təsir göstərərək qısaqapanmalar və nəqliyyatın iflici kimi hallara zəmin yaradır.
Bu isə məsuliyyət məsələsini gündəmə gətirir: yaranmış vəziyyətə görə cavabdeh şəxslərin müəyyən edilməsi və problemin obyektiv qiymətləndirilməsi cəmiyyət üçün prinsipial əhəmiyyət kəsb edir.
Məsələ ilə bağlı memar Elçin Əliyev Crossmedia.az-la öz fikirlərini bölüşüb:
"Əsas faktor mən hesab edirəm ki, stansiyanın bu vəziyyətə düşməsində rüşvətxorluq və korrupsiyadır. Birincisi, layihə hazırlanarkən bu, Bakının ən gənc stansiyalarından biridir və təxminən 24 il əvvəl müstəqillik dövründə inşa olunub. Fövqəladə Hallar Nazirliyi və Şəhərsalma və Arxitektura Komitəsi tərəfindən layihələr ciddi şəkildə nəzarət altında hazırlanır, həm memarlıq, həm də konstruktiv baxımdan yüksək standartlar tətbiq olunur. Elə buna görə də belə stansiyalarda layihə elə işlənir ki, fövqəladə hallar zamanı belə davamlı olsun və ciddi təhlükə yaranmasın.
Əsas layihə sənədləri ümumilikdə yüksək səviyyədə olur. Problemlər isə əsasən tikinti mərhələsində yaranır. Tikinti zamanı bəzən material keyfiyyətinə əməl olunmur.
Məsələn, layihədə göstərilən 10 mm armatur əvəzinə 8 mm istifadə edilir və ya sementin keyfiyyəti aşağı salınır. Bu isə birbaşa nəzarətsizlik və sui-istifadə hallarından qaynaqlanır. Nəticədə tikinti zamanı lazımi keyfiyyət təmin olunmur və bu da sonradan ciddi problemlərə gətirib çıxarır.
Digər tərəfdən, stansiyanın ətraf mühitinə baxdıqda da vəziyyət qənaətbəxş deyil. Piyadalar üçün keçid yollarının zəbt olunması, qeyri-qanuni ticarət obyektlərinin yaranması və sanitar qaydalara əməl olunmaması ərazidə əlavə problemlər yaradır.
Su sızmaları və nəzarətsiz fəaliyyətlər nəticəsində stansiyanın konstruksiyasına da mənfi təsir göstərilir. Bu hallar hidroizolyasiya işlərinin lazımi səviyyədə aparılmamasını göstərir və nəticədə strukturun zədələnməsinə səbəb olur.
Ümumilikdə bu vəziyyətin əsas səbəbi kimi nəzarətsizlik və korrupsiya göstərilir. Su sızmaları nəticəsində dəmir konstruksiyalarda korroziya yaranır və bu, zamanla ciddi aşınmaya gətirib çıxarır. Estetik baxımdan da bəzi üzlüklərin dəyişdirilməsinə ehtiyac var, lakin bu tədbirlər köklü həll deyil. Əsas məsələ sistemli şəkildə təmir və nəzarətin gücləndirilməsidir. İlk növbədə ətraf ərazilər təmizlənməli, daha sonra isə stansiyanın özündə mərhələli şəkildə əsaslı təmir işləri aparılmalıdır".
Məsələ ilə bağlı Bakı Metropoliteninindən sorğumuza cavab olaraq isə bildirilib ki, “Həzi Aslanov” stansiyası 1981–1987-ci illərdə mürəkkəb mühəndis-geoloji və hidrogeoloji şəraitə malik ərazidə inşa edilib və sonrakı dövrlərdə tikinti prosesində fasilələr və ərazidə hidrogeoloji vəziyyətin dəyişməsi, eləcə də qrunt sularının təsiri stansiya infrastrukturunda müəyyən aşınmalara səbəb olub.
Məhz bu amillər nəzərə alınaraq, 30 noyabr 2024-cü il tarixindən etibarən stansiyanın dalan yolunda planlı əsaslı təmir və yenidənqurma işlərinə başlanılıb. Təmir işləri çərçivəsində dalan yolunda izolyasiya qatları yenilənir və gücləndirilir, konstruksiyalar tamamilə yenidən qurulur və infrastruktur daha dayanıqlı vəziyyətə gətirilir.
Qurumdan həmçinin dalan yolunun tikintisinin 2026-cı ilin sentyabr ayına kimi başa çatdırılması planlaşdırıldığı qeyd olunub.
“Həzi Aslanov” stansiyasının yenidənqurulması isə 2025–2030-cu illəri əhatə edən Dövlət Proqramına uyğun olaraq, “Həzi Aslanov” stansiyasına keçid funksiyası daşıyacaq “Y-17” stansiyasının inşası dövründə həyata keçiriləcək.
Bununla yanaşı, stansiya daim nəzarətdə saxlanılır, mütəmadi texniki baxış və qulluq işləri aparılır. Qrunt suları və yağıntıların təsiri nəzarət altındadır, təhlükəsiz istismar tam təmin olunur.
Elmir Heydərli
17:15 27.04.2026
Oxunuş sayı: 729
