Azərbaycan və Ermənistan arasında sülh müqaviləsi imzalanmayacaq - AÇIQLAMA
Azərbaycan və Ermənistan arasında son dövrlərdə həyata keçirilən delimitasiya prosesi, iki ölkə arasındakı sərhədlərin dəqiq müəyyənləşdirilməsinə yönəldilib. Bu məsələnin tamamlanması müxtəlif siyasi və strateji məsələlərlə bağlıdır. Azərbaycan tərəfi, delimitasiya prosesində bəzi mühüm ərazilərin azad edilməsi və regionda sülhün təmin olunması üçün bir neçə tələbin yerinə yetirilməsini vacib hesab edir. Bu tələblər arasında Kərki və Qazax kəndlərinin Azərbaycana birləşdirilməsi və Naxçıvanda anklav-eksklav məsələlərinin həlli əsas yer tutur. Həmçinin, Zəngəzur dəhlizi və onun gələcək taleyi, regionda sülh müqaviləsinin imzalanmasını çətinləşdirən mühüm məsələlərdən biridir.
Mövzu ilə bağlı Crossmedia.az-a açıqlama verən politoloq Əhəd Məmmədli həmin problemlərdən və Azərbaycan tərəfinin mövqeyindən danışıb:
"Kərki və Qazağın 3 kəndinin Azərbaycana birləşdirilməsi məsələsi hələ də həll olunmadan qalmaqdadır. Onlar azad edilməlidir və Azərbaycana birləşdirilməlidir. Delimitasiya olsa belə sülh müqaviləsinin imzalanacağını düşünmürəm. Çünki ortada Zəngəzur dəhlizi məsələsi var. Azərbaycanın da son açıqlamalarına görə bu məsələ hələ də qapanmayıb. Ermənistan, İran, ABŞ, Fransa tezliklə bu məsələni qapadıb, Azərbaycanı reallıqla razılaşdırmaq istəyirlər. Amma rəsmi Bakının son məsələlərə yanaşmasına baxsaq görərik ki, bu mövzu qapanmayana qədər delimitasiya hansı səviyyədə gedirsə getsin sülh müqaviləsi imzalanmayacaq. Çünki Azərbaycanın tələbləri tam yerinə yetirilməlidir".
Politoloq sonda əsas problem olaraq 4 kəndin azad edilməsinin vacib olduğunu vurğulayıb.
Banuçiçək Kalbalıyeva
08:09 12.12.2024
Oxunuş sayı: 8865
