“Ermənistan bu məsələyə məhəl qoymur” – Ekspertdən AÇIQLAMA
Azərbaycan və Ermənistan arasında sülh müqaviləsinin imzalanması üçün qarşıya çıxan problemlər təkcə siyasi deyil, həm də dərin hüquqi və tarixi köklərə malikdir. Azərbaycan hökuməti daimi sülhün əldə olunması üçün hüquqi prosedurların tam həyata keçirilməsini tələb edir. Lakin bu mürəkkəb proses, regionda uzunmüddətli sabitliyə nail olmaq üçün ciddi addımlar atılmasını zəruri edir.
Mövzu ilə bağlı Crossmedia.az-a açıqlama verən siyasi şərhçi Zeynal Əmrəliyev sülh müqaviləsinin qarşısında duran maneələri şərh edib:
“Bu problemlər əsasən Ermənistan tərəfindən qaynaqlanır. Birinci problem Ermənistanın konstitusiyası ilə bağlıdır. Ermənistan konstitusiyasında Azərbaycanın ərazi iddiaları ilə bağlı maddələr yer alır. Azərbaycan tərəfi dəfələrlə bu maddələrin konstitusiyadan çıxarılmasını tələb edib. Lakin təəssüf ki, Ermənistan bu məsələyə məhəl qoymur və problemi həll etməkdən yayınır. Ermənistan konstitusiyasında Azərbaycanın və Türkiyənin əleyhinə maddələrin olması gələcəkdə Ermənistanın revanşist qüvvələrinə torpaq iddiaları ilə çıxış etməsinə zəmin yarada bilər. Bu, Azərbaycan üçün qəbul edilməzdir. Biz daimi sülhün əldə olunmasını istəyirik və bunun üçün bütün hüquqi prosedurların həyata keçirilməsini vacib hesab edirik”.
Politoloq sülh müqaviləsinin qarşısındakı ikinci əsas maneənin isə Qərbi Azərbaycanda yaşayan soydaşlarımızın öz yurdlarına müstəqil şəkildə qayıtması məsələsi olduğunu vurğulayıb:
“Ermənistan hökuməti bu məsələyə də məhəl qoymur və müxtəlif bəhanələrlə bu prosesi gündəmə gətirməməyə çalışır. Halbuki bu, çox önəmli bir məsələdir. Həmin insanlar uzun müddətdir öz dədə-baba torpaqlarından ayrı düşüblər və onların hüquqları Ermənistan tərəfindən ciddi şəkildə pozulub. Ermənistan bu insanların yaşayış şəraitini təmin etməyə borcludur. Qərbi azərbaycanlı soydaşlarımız öz torpaqlarına qayıtmalı və onların təhlükəsizliyi təmin olunmalıdır. Bununla bağlı Ermənistan hökuməti müvafiq addımlar atmalıdır”.
Zeynal Əmrəliyev əlavə edib ki, Ermənistanın bəzi Qərb dövlətlərinin, o cümlədən Fransanın dəstəyi ilə sülh müqaviləsindən yayınması prosesi daha da çətinləşdirir:
“Bu kimi məsələlər Azərbaycan və Ermənistan arasında sülhün əldə olunmasının əsas maneələridir. Əsas problem Ermənistan hökumətinin qeyri-konstruktiv yanaşmasıdır. Biz daimi sülhün əldə olunmasını və bu problemlərin həllini arzulayırıq”.
Samirə Şərif
14:56 11.12.2024
Oxunuş sayı: 8644
