Heydər Əliyev: Azərbaycan xalqının əbədi lideri
Cross Media Təhlil Mərkəzinin analitiki, Crossmedia.az saytının baş redaktoru, siyasi şərhçi Mübariz Göyüşlü Olaylar.az-a açıqlamasında Ümummilli Lider Heydər Əliyevin müasir Azərbaycan dövlətinin qurulmasında və möhkəmləndirilməsində müstəsna rolunu vurğulayıb.
"Ümummilli Lider Heydər Əliyev müasir Azərbaycan Respublikasının banisidir. Onun nəhəng dövlətçilik təcrübəsi, siyasi biliyi və böyük siyasi xadim olması müasir Azərbaycan dövlətinin formalaşmasında, bu günlərə qədər gəlib çatmasında müstəsna əhəmiyyət kəsb etmişdir. Heydər Əliyev sayəsində Azərbaycan dövləti dağılmaqdan, xalqımız isə parçalanmaqdan və zəif bir vəziyyətdə düşməkdən xilas oldu.
Həm Sovet İttifaqı rəhbərliyində təmsil olunduğu dövrdə, həm də müstəqil Azərbaycan Respublikasının lideri olaraq, Heydər Əliyev hər zaman xalqın siyasi, iqtisadi, hərbi, təhsil, elm, səhiyyə və mədəni sahələrdə inkişafı üçün yorulmadan çalışıb. Onun fəaliyyəti hər sahədə öz izini qoyub. Bu mənada hesab edirəm ki, Azərbaycan durduqca, Heydər Əliyev adı əbədi olaraq yaşayacaq", - deyə Mübariz Göyüşlü bildirib.
Analitik qeyd edir ki, Heydər Əliyevin vəfatından sonra onun irəli sürdüyü ideyalar və dövlətçiliyin qorunması ilə bağlı tövsiyələr Prezident İlham Əliyev tərəfindən uğurla həyata keçirilir:
"Heydər Əliyevin vaxtilə qoyduğu təməl, irəli sürdüyü tezislər bu gün öz nəticəsini verir. İlham Əliyev, Ümummilli Liderin siyasi ənənələrini davam etdirərək, Azərbaycan torpaqlarını işğaldan azad edib və ölkəmizi güclü, bütöv bir dövlətə çevirməyi bacarıb. Heydər Əliyevin ideyaları bu gün də dövlətimizin inkişafına xidmət edir".
M.Göyüşlü vurğulayıb ki, Heydər Əliyev Fondunun fəaliyyəti və Mehriban xanım Əliyevanın bu fond çərçivəsində gördüyü işlər Ümummilli Liderin irsinin təbliğində mühüm rol oynayır:
"Heydər Əliyev adına Fondun həyata keçirdiyi xeyriyyə işləri onun adının layiqincə yaşadılmasını təmin edir. Azərbaycan xalqı hər zaman Heydər Əliyevi hörmətlə yad edəcək, çünki onun qoyduğu dövlətçilik ənənələri və irsi daim gələcək nəsillər üçün örnək olacaq".
Şərhçi əlavə edib ki, Heydər Əliyev və Azərbaycan bir-birindən ayrılmaz anlayışlardır və Ümummilli Liderin adı hər zaman xalqımızın qəlbində yaşayacaq.
15:00 11.12.2024
Oxunuş sayı: 29801
