ABŞ Liviyada Rusiyaya qarşı qüvvələri birləşdirməyə çalışır
ABŞ Liviyada Tripoli hökuməti ilə Liviya Milli Ordusu arasında vasitəçi kimi çıxış edərək tərəfləri yaxınlaşdırmağa çalışır.
Crossmedia.az bu barədə xarici mediaya istinadən xəbər verir. Məlumata görə, məqsəd Rusiyanın ölkədəki təsirini zəiflətməkdir.
Bildirilir ki, ABŞ general-leytenantı Con Brennan Sirt bölgəsində keçirilən ilk birgə hərbi təlimlərə nəzarət edib. ABŞ-nin sülh planı çərçivəsində vahid komandanlığın yaradılması müqabilində BMT-nin silah embarqosundan müəyyən azadolmalar vəd olunur.
İlk dəfə olaraq ölkədə hər iki tərəf üçün ortaq büdcə qəbul edildiyi qeyd olunur. Planın əsas hədəfi Rusiyanı Liviyadan sıxışdırmaq, Belarus və Rusiya silahlarından asılılığı azaltmaq və Moskvanın Afrikaya hava körpüsünü zəiflətməkdir.
Yaxınlaşmanın artıq müşahidə olunduğu bildirilir: orta səviyyəli komandirlər Sirt yaxınlığında yaradılan ortaq mərkəzdə birlikdə fəaliyyət göstərir, altı nəfərlik birgə komitə formalaşdırılıb.
ABŞ xüsusi təyinatlı qüvvələri təlimlərdə iştirak edib, Almaniya tibbi dəstək verib, Türkiyə pilotsuz uçuş aparatları təmin edib. Təlimlərdə həmçinin İtaliya, Böyük Britaniya, Misir, Fransa və Çad nümayəndələri iştirak ediblər.
BMTnin məlumatına görə, son dövrdə dörd İŞİD hüceyrəsi zərərsizləşdirilib.
İqtisadi göstəricilərə gəlincə, neft hasilatı son on ilin ən yüksək səviyyəsinə – gündəlik 1,43 milyon barelə çatıb. Chevron dənizdə fəaliyyət üçün lisenziya alıb, ExxonMobil isə ölkəyə qayıdış edir.
Analitiklər hesab edir ki, sabitləşmə uran, litium və kobalt kimi strateji resursların işlənməsinə şərait yarada və ABŞ-ın regiondakı təsirini daha da gücləndirə bilər.
10:30 16.04.2026
Oxunuş sayı: 54
