Yeni dezinformasiya silahı - Nüvə müharibəsi ehtimalı, yoxsa siyasi manipulyasiya?
Son dövrlərdə beynəlxalq mediada nüvə silahlarının mümkün istifadəsi və regiondakı hərbi qarşıdurmalarla bağlı məlumatlar geniş müzakirə olunur. Bu məlumatların əksəriyyəti həm siyasi, həm də strateji maraqları əks etdirir və bəzən dezinformasiya xarakteri daşıya bilər.
Hər bir xəbər, açıqlama və ya iddia yalnız ilkin təəssürat yaratmaq üçün deyil, həm də qlobal təhlükəsizlik və diplomatik balans üçün ciddi nəticələrə yol aça bilər.
Bu kontekstdə, dövlətlərin açıqlamaları, hərbi addımları və nüvə qüdrətləri ətrafında formalaşan məlumatları diqqətlə analiz etmək vacibdir. İnsanların, jurnalistlərin və siyasətçilərin məqsədi yalnız informasiyanı ötürmək deyil, eyni zamanda onun doğruluğunu qiymətləndirmək və münaqişələrin nəticələrini mümkün qədər obyektiv dəyərləndirmək olmalıdır.
Məsələ ilə bağlı politoloq Natiq Miri Crossmedia.az-la öz fikirlərini bölüşüb:
Mənim qənaətimcə, bu xəbərlər bilavasitə xüsusi qüvvələr — İran, Rusiya və Çin kimi maraqları olan güc mərkəzləri tərəfindən dövrəyə buraxılıb və heç bir real əsası yoxdur.
Dünyaya ağalıq etmək istəyən hegemon bir dövlət özündən xeyli zəif olan bir ölkəyə qarşı nüvə silahından istifadə etməz. Nüvə silahının istifadəsi həm digər dövlətlər üçün presedent yaradacaq, həm də nüvə müharibəsinə yol aça bilər.
Məsələn, digər nüvə sahibi ölkələr taktiki nüvə silahından istifadə etmək barədə düşünə bilər. Buna görə də, mən bu məlumatların daha çox çəkindirici və qabaqlayıcı xarakter daşıyan dezinformasiya olduğunu düşünürəm.
İndiki vəziyyətdə ABŞ və İsrailin İrana hərbi müdaxiləsi beynəlxalq hüquq baxımından müdafiə oluna bilməz. Hər hansı bir hücum nüvə silahlarının istifadəsi ilə müşayiət olunarsa, bu, insanlıq əleyhinə böyük cinayət sayılacaq.
Tarixi nümunələr göstərir ki, 1945-ci ildə Yaponiyaya qarşı istifadə olunan nüvə silahları həm eksperiment, həm də digər dövlətlərə güc nümayişi məqsədi daşıyırdı. Lakin bu gün nüvə silahından istifadənin heç bir məntiqi və izahı yoxdur.
Hər hansı bir hərbi müdaxilə nəticəsində yaranan qlobal iqtisadi təsirlər — neft və ərzaq məhsullarının qiymətlərində artım — birbaşa ABŞ və İsrailin üzərinə yazılacaq.
Digər tərəfdən, İranın öz xalqına qarşı kütləvi qətl törətmədiyi müşahidə olunur. Açılmış cinayət işlərinin əksəriyyəti absurd ittihamlar, məsələn, Allaha qarşı üsyan maddəsi ilə bağlıdır. Bu isə məlumatları ötürməzdən əvvəl hər kəsi diqqətli olmağa çağırır.
Rusiya məsələsinə gəlincə, Ukraynada 4 ildən artıqdır davam edən müharibədə mülki infrastruktura və əhaliyə qarşı törədilən cinayətlər dəqiq şəkildə qiymətləndirilməlidir.
Nəticə etibarilə, ABŞ, İsrail və İran tərəfindən verilən əksər məlumatlar dezinformasiya xarakteri daşıyır və məqsədli şəkildə yönləndirilir. Hətta ən yüksək səviyyəli dövlət məmurları, o cümlədən prezidentlərin bəyanatları belə bu kateqoriyaya daxil ola bilər.
Müharibə vəziyyətində belə dezinformasiyanın yayımlanması, insanların düzgün məlumat almasını çətinləşdirir və buna görə də hər kəs bu cür məlumatlara skeptik yanaşmalıdır".
Elmir Heydərli
12:00 07.04.2026
Oxunuş sayı: 995
