Ermənistan-Azərbaycan sərhəd delimitasiyasında müsbət nəticə var?
Ermənistanın xarici işlər naziri Ararat Mirzoyan Ermənistan-Azərbaycan sərhədinin delimitasiya prosesində irəliləyiş olduğunu açıqlayıb. Onun sözlərinə görə, bu proses münasibətlərin normallaşması istiqamətində vacib addımdır. A.Mirzoyan, həmçinin kommunikasiyaların bərpası və iki ölkə arasında tranzitin təşkil olunması mövzularında müsbət nəticələrin əldə edilə biləcəyini vurğulayıb.
Bakı Dövlət Universitetinin müəllimi, hüquq üzrə fəlsəfə doktoru Əlövsət Allahverdiyev məsələ ilə bağlı Crossmedia.az-a bildirib ki, sərhədlərin delimitasiyası məsələsində Azərbaycan həmişə konstruktiv mövqe nümayiş etdirib. Onun sözlərinə görə, delimitasiya prosesi beynəlxalq normalar əsasında həyata keçirilməli və hər iki tərəfin razılaşdırılmış mövqeyi ilə tamamlanmalıdır.
"Azərbaycan həmişə demokratik prinsiplər çərçivəsində müzakirələrdə iştirak edib və müvafiq təkliflər irəli sürüb. Təəssüf ki, Ermənistan bu təkliflərə birmənalı yanaşmayıb. Bu, prosesin tam nəticələnməsinə mane olur", – deyə o qeyd edib.
Əlövsət Allahverdiyev vurğulayıb ki, delimitasiya sərhədlərin xəritədə dəqiq müəyyənləşdirilməsi, demarkasiya isə bu sərhədlərin ərazidə fiziki şəkildə təsbit edilməsidir. Hazırda Azərbaycan tərəfi əsas diqqəti delimitasiya prosesinə yönəldib və bu istiqamətdə həm Avropa İttifaqı, həm də Rusiya kimi beynəlxalq tərəfdaşların dəstəyini qazanıb.
"Bununla belə, Ermənistan tərəfi hələ də qəti mövqe nümayiş etdirmədiyi üçün proses uzanır. Əgər sərhədlər dəqiq müəyyən edilməzsə, bu, gələcəkdə münaqişələrə zəmin yarada bilər", – deyə o bildirib.
Ekspertin fikrincə, sərhədlərin müəyyənləşdirilməsi uzunmüddətli sabitlik üçün mühüm addımdır. O, əlavə edib ki, bu məsələ qarşılıqlı razılıq əsasında həll edilməzsə, gələcəkdə yenidən gərginliklər yarana bilər: "2020-ci ildə Azərbaycan öz ərazilərini işğaldan azad etdiyi kimi, sərhəd məsələlərində də hüquqlarını qorumağa hazırdır. Lakin hər iki tərəfin səmimi və konstruktiv yanaşması sabitliyin təmin olunmasını sürətləndirəcək".
Allahverdiyev həmçinin Ermənistanın kənar təsirlərdən təsirləndiyini və bunun delimitasiya prosesini yavaşlatdığını bildirib. Onun fikrincə, dövlətlərin daxili işlərinə müdaxilə edilməməli və bu məsələ beynəlxalq hüquq prinsipləri çərçivəsində həll olunmalıdır:"Ermənistanın qonşularla əməkdaşlıqdan kənarda qalması onun təkbaşına inkişafına ciddi mane olur. Buna görə də Ermənistan öz mövqeyini dəqiqləşdirməli və konkret addımlar atmalıdır".
Ekspert hesab edir ki, hazırkı vəziyyət Ermənistanın yumşalma mövqeyi nümayiş etdirdiyini göstərir. Bu isə tərəflərin gələcəkdə razılığa gəlməsi və sərhədlərin müəyyənləşdirilməsi prosesinin sürətlənməsi üçün müsbət siqnaldır.
Sərhəd məsələsinin həlli yalnız regionda sülh və sabitlik üçün deyil, həm də iqtisadi və diplomatik əlaqələrin inkişafı baxımından vacibdir. Ermənistanın bu məsələdə konkret qərarlar verməsi yaxın gələcəkdə ciddi irəliləyişlərin əldə olunmasına zəmin yarada bilər.
Nihat Tahirov
12:33 10.12.2024
Oxunuş sayı: 5654
