Diaspor

İsraildə Nobert Yevdayevə həsr olunan tədbir keçirilib

İsrailin Afula şəhərinin Mərkəzi Kitabxanasında Amerika yazıçısı, tərcüməçi və jurnalist, tanınmış ictimai xadim, “Novıy rubej” qəzetinin baş redaktoru mərhum Nobert Mixayloviç Yevdayevin yaradıcılığına həsr olunmuş ədəbi-bədii gecə keçirilib.

Crossmedia.az Diasporla İş üzrə Dövlət Komitəsi məlumat yayıb.

Tədbir Azərbaycan Mədəniyyət Mərkəzi və "Şolumi" Dağ Yəhudiləri Mədəniyyət Mərkəzinin birgə təşkilatçılığı və Afula Bələdiyyəsinin dəstəyi ilə baş tutub.

Tədbirdə Nobert Yevdayevin "Bakıda futuristlərin poeziya başlanğıcı" adlı son kitabı təqdim edilib. Əsərdə Azərbaycanın sənayesinin, mədəniyyətinin və incəsənətinin sürətli inkişaf dövründən bəhs olunur.

Bədii gecədə Azərbaycan Yazıçılar Birliyinin və İsrail Yazıçılar Birliyinin üzvü şair Mixail Salman və “Azİz” İsrail-Azərbaycan Xalqlararası Əlaqə Assosiasiyasının icraçı direktoru Şaul Siman-Tov mövzu ilə bağlı maraqlı çıxışlar ediblər.

Sonda adıçəkilən kitab tədbir iştirakçılarına hədiyyə olunub.

Qeyd edək ki, Nobert Yevdayev 1929-cu ildə Bakıda anadan olub. Uzun illər Moskvada fəaliyyət göstərən yazıçı 1989-cu ildən ABŞ-yə köçüb və 2022-ci ildə 93 yaşında dünyasını dəyişib. Onun yaradıcılığında Azərbaycanın tarixi, mədəniyyəti, milli adət-ənənələri xüsusi yer tutub.