Azərbaycan kolonial idarəçiliyin əleyhinə: Dünya üçün Ədalət!
Bakı Təşəbbüs Qrupu öz fəaliyyətini genişləndirərək, Fransa və Niderlandın kolonial siyasətinə qarşı mübarizəni daha da gücləndirir. Qrupun diqqət mərkəzində Fransız Polinezyası və Sen Martin adasındakı müstəmləkəçilik problemləri dayanır.
Mövzu ilə bağlı Crossmedia.az-a danışan politoloq Əliqismət Bədəlov Azərbaycanın beynəlxalq tədbirlər üçün ideal bir mərkəzə çevrildiyini vurğulayıb:“Son illərdə Azərbaycan beynəlxalq səviyyəli tədbirlərin keçirildiyi bir mərkəzə çevrilmişdir. Nüfuzlu təşkilatların Bakını seçmələrinin əsas səbəblərindən biri ölkəmizin sabitlik adası kimi tanınmasıdır. Bu konfrans, Azərbaycanın beynəlxalq məsələlərə həssas yanaşmasının və qlobal problemlərin həllinə verdiyi dəstəyin daha bir sübutudur”.
Bakı Təşəbbüs Qrupunun fəaliyyətindən danışan Əliqismət Bədəlov bildirib ki, təşkilat uzun illərdir kolonializm mövzusunda dünya miqyasında rezonans doğuran tədbirlər təşkil edir:“Bakı Təşəbbüs Qrupu bu günədək 22 beynəlxalq tədbir keçirib, 23 memorandum imzalayıb. Bu, Azərbaycanın belə mövzularda fəal mövqe nümayiş etdirməsinin, qlobal müstəvidə məsuliyyətli yanaşmasının açıq göstəricisidir”.
Konfransda çıxış edən Sen Martin parlamentinin üzvü Franklin Meyers-in çıxışını vurğulayan Ə. Bədəlov, adadakı kolonial idarəçiliyin yaratdığı problemləri diqqətə çatdırıb: “Fransa və Niderland hökumətləri Sen Martinin inkişafı üçün lazımi tədbirləri görmək əvəzinə, resurslarından öz maraqları üçün istifadə edir. Bu yanaşma həm sosial, həm də iqtisadi problemlərin daha da dərinləşməsinə səbəb olur”.
Politoloq Əliqismət Bədəlov Azərbaycanın kolonializm siyasətinə qarşı prinsipial mövqeyini vurğulayaraq bildirib:“Azərbaycan Prezidenti İlham Əliyev dəfələrlə kolonializm siyasətini tənqid edərək, bu yanaşmaların insan hüquqlarına zidd olduğunu vurğulayıb. O, xüsusilə Fransanın kolonial siyasətini kəskin tənqid edərək qeyd edib ki, ‘Fransa, Afrika və digər kolonial ərazilərdə tətbiq etdiyi siyasətə son qoymalıdır. Bu cür yanaşmalar müasir dünyada yolverilməzdir”.
BMT-nin COP29 konfransı çərçivəsində keçirilən “Sülh və Yaşıl Dünya Naminə Müstəmləkəçiliyə Son” aksiyası Azərbaycanın bu məsələlərdə oynadığı fəal rolu bir daha nümayiş etdirib. Aksiyada kolonial idarəçiliyin yaratdığı sosial və ekoloji problemlər müzakirə olunub.
Əliqismət Bədəlov Azərbaycanın beynəlxalq tədbirlərə ev sahibliyi etməsini xarici siyasətin uğurlu addımı kimi qiymətləndirib:“Azərbaycan hər zaman müstəmləkəçilik siyasətindən əziyyət çəkən xalqların yanında olub və onların haqlı mübarizəsinə dəstək göstərməkdə davam edir. Bu, ölkəmizin qlobal miqyasda artan nüfuzunun göstəricisidir”.
Gələcəkdə də Azərbaycanın bu cür tədbirlərə ev sahibliyi etməsi gözlənilir. Bu, ölkəmizin qlobal məsələlərdə qətiyyətli və prinsipial mövqeyini təsdiqləyərək, dünya diplomatiyasına mühüm töhfələr verəcəyini göstərir.
Nihat Tahirov
14:52 09.12.2024
Oxunuş sayı: 11859
