İran sona qədər döyüşəcək? - Xamenei ABŞ-a ‘yox’ dedi
Yaxın Şərqdə gərginlik yenidən yüksəlməkdədir. İranın Ali rəhbəri Ayətullah Müctəba Xamenei ABŞ ilə dialoq və atəşkəsin əldə olunması istiqamətində irəli sürülən təklifləri rədd edib.
Bu mövqe regionda mövcud olan münaqişələrin gərginliyini artırmaq potensialına malikdir. Xüsusilə, ABŞ və İsrail ilə münasibətlərdə.
Eyni zamanda, bu qərar Laricaninin öldürülməsi və son dövrdə baş verən hadisələr fonunda davam edən hərbi və siyasi proseslərin perspektivini təhlil edərkən, münaqişənin uzunmüddətli və mürəkkəb xarakterini ön plana çıxarır.
Mövzu ilə bağlı politoloq Zaur Məmmədov Crossmedia.az-a açıqlama verib:
"Müctəbanın dedikləri hal-hazırda əsas məqsəd deyil. Ona görə ki, İrandakı hakimiyyətə o sahib deyil. İranda hakimiyyət hazırda SEPAH tərəfindən idarə edilməkdədir.
Lakin onun dediklərində əsas istiqamət artıq ondan xəbər verir ki, bəli, SEPAH sona qədər döyüşmək istəyir. Amma bunu da biz tam olaraq nəticə kimi götürə bilmərik.
Ona görə ki, SEPAH daxilində də İsrail və ABŞ ilə danışıqlara gedən və yaxud danışıqlara hazır olan şəxslər var. Xüsusilə də, Laricanın öldürülməsi onu göstərir ki, İsrailin və ABŞ-nin əsas hədəfi bir-bir İranın hərbi, dini liderlərini aradan qaldırmaq, təbii ki, onların aradan qaldırılmasından sonra ortada qalanlarla müzakirələr aparmaq, konsensus əldə etmək daha asan olacaqdır.
Yəni görünən odur ki, İsrailin əsas məqsədi İranın tam olaraq kapitulyasiya getməsidir".
Politoloq əlavə edib ki, söhbət hər hansı bir sadə danışıqlardan və dialoqdan gedə bilməz:
"Söhbət məhz siyasi, hərbi, iqtisadi kapitulyasiyadan gedir ki, bu, birbaşa olaraq İranın İsrailin tələblərini yerinə yetirilməsinə və ABŞ-nin tələbləri haqqında razılıq verməsi masa üzərində olacaq danışıqlarda əsas mövzular olacaqdır.
Yəni əgər müharibəyə qədər danışıqlarda başqa mövzular var idisə, müharibədən sonra danışıqlarda eyni mövzular olmayacaq, daha sərt kapitulyasiya masa üzərində olacaqdır.
Hadisələrin gedişatı isə onu deməyə əsas verir ki, ABŞ-də və İsraildə başa düşürlər ki, onların başqa yolu yoxdur. Onlar vuruşmalıdırlar və indiki halda müharibə dayanarsa, bu heç də qalibiyyət sayılmayacaq.
Tam olaraq daxili auditoriya üçün də qələbənin əldə edilməsi və dövlətlər qarşısında prioritetlərin həll edilməsi üçün mütləq şəkildə demək İranın təslim olması lazımdır".
Nigar Yahyazadə
15:20 19.03.2026
Oxunuş sayı: 46
