Haaqada yaşayan azərbaycanlı qadınların görüşü olub
8 Mart – Beynəlxalq Qadınlar Günündə Haaqada yaşayan azərbaycanlı qadınların görüşü keçirilib. Görüş Hollandiya-Azərbaycan Türk Mədəniyyət Dərnəyinin təşkilatçılığı və Haaqa şəhər bələdiyyəsinin dəstəyi ilə baş tutub.
Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.
Soydaşımız xanımlar bir araya gələrək bayramı yüksək ovqatla qeyd edib, eyni zamanda müxtəlif mövzularda geniş fikir mübadiləsi aparıblar.
Diaspor üzvlərindən Afət Yusufova qadın hüquqları mövzusunda çıxış edib. Bildirib ki, xüsusilə hüquqi savadlılığın artırılması qadınların ictimai həyatda daha fəal mövqe tutmasına imkan yaradır, eləcə də güclü, inklüziv və ədalətli cəmiyyətin formalaşmasında mühüm rol oynayır.
Leyla Çiçək qadınlar arasında həmrəylik mövzusuna toxunaraq, xaricdəki Azərbaycan icmaları arasında qadın həmrəyliyinin önəmindən danışıb. O, qadınların əməkdaşlığının mədəni dəyərlərin qorunmasına, eləcə də sosial birliyin möhkəmlənməsinə əhəmiyyətli təsirinə də diqqət çəkib.
Fidan Fizza Rəhimova isə qadınların fəallığının və potensialının dəstəklənməsinin sosial tərəqqiyə mühüm töhfə verdiyini deyib. O həmçinin savadlı qadınların güclü cəmiyyətin formalaşmasının əsas dayaqlarından biri olduğunu bildirib.
Qeyd edək ki, qadınların bir araya gəlməsi, təcrübə və fikir mübadiləsi aparması diaspor icmalarında həmrəyliyin möhkəmlənməsinə və milli-mədəni dəyərlərin qorunub yaşadılmasına mühüm töhfə verir.
18:25 13.03.2026
Oxunuş sayı: 20
