Fransa qüvvələrinə xəbərdarlıq: Bazalardan uzaq durun
İraqda fəaliyyət göstərən İrana bağlı silahlı qrup Əshab əl-Kəhf ölkədəki və regiondakı Fransa maraqlarını hədəf ala biləcəyi barədə açıqlama yayıb.
Crossmedia.az bu barədə xarici mediaya istinadən xəbər verir.
Qrupun bəyanatı Fransanın "Şarl de Qoll" təyyarədaşıyan gəmisinin Şərqi Aralıq dənizinə çatmasından sonra verilib. Bildirilib ki, Fransanın İraqdakı və regiondakı maraqları potensial hədəf kimi qiymətləndirilir.
Açıqlamada yerli sakinlərə də çağırış edilərək, Ərbildə yerləşən və Fransa qüvvələrinin istifadə etdiyi bazadan ən azı 500 metr uzaq durmaları tövsiyə olunub.
Bununla belə, qrup dünən gecə Ərbildəki bazaya edilən dron hücumuna görə birbaşa məsuliyyəti üzərinə götürməyib. Həmin hücum nəticəsində bir fransız əsgərinin öldüyü, bir neçə nəfərin isə yaralandığı bildirilir.
Qeyd edək ki, “Əshab əl-Kəhf” 2019-cu ilin avqustunda yaradılıb. Qrupun fəaliyyəti xüsusilə Qasım Süleymaninin 2020-ci ildə ABŞ tərəfindən öldürülməsindən sonra daha da fəallaşıb. Süleymani İranın İslam İnqilabı Keşikçiləri Korpusunun xüsusi təyinatlı Qüds Qüvvələrinin keçmiş komandiri idi.
09:59 14.03.2026
Oxunuş sayı: 41
