Diaspor

Xocalı soyqırımı qurbanları Zalsburqda anıldı

Avstriyanın Zalsburq şəhərində yerləşən Azərbaycan Evində Xocalı soyqırımının 34-cü ildönümünə həsr olunan anım tədbiri keçirilib.

Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.

Əvvəlcə Vətənimizin bütövlüyü uğrunda canından keçən qəhrəman şəhidlərimizin, eləcə də Xocalıda qətlə yetirilən günahsız insanların əziz xatirəsi dərin ehtiramla yad edilib.

Avstriya Azərbaycanlıları Cəmiyyətinin rəhbəri Fərid Əzizov çıxışında Xocalı soyqırımını bəşər tarixinin ən faciəli səhifələrindən biri adlandırıb. Bu qətliamın yalnız Azərbaycan xalqına qarşı deyil, bütövlükdə insanlıq əleyhinə törədilən amansız cinayət olduğunu bildirib. Qeyd edib ki, Xocalı həqiqətlərinin unudulmaması və beynəlxalq ictimaiyyətə çatdırılması hər bir azərbaycanlının mənəvi borcudur.

Zalsburq Azərbaycan Evinin nəzdindəki həftəsonu Azərbaycan məktəbinin müəllimi, diasporumuzun fəal üzvü Həcər Bağcı Xocalıda dinc əhaliyə açılan atəşlərin, törədilən zorakılıqların beynəlxalq hüquq normalarını kobud şəkildə pozduğunu söyləyib. Müzəffər Ali Baş Komandan İlham Əliyevin rəhbərliyi ilə Xocalının artıq işğaldan azad olunduğunu və şəhərin sakinlərinin uzun illərin həsrətindən sonra doğma yurdlarına qayıtdığını qürurla xatırladıb.

Azərbaycan Evində həmin qanlı gecədə həyatını itirənlərin xatirəsinə xüsusi guşə də yaradılıb. Guşədə faciəni əks etdirən, tarixi faktları göstərən fotoşəkillər və məlumat lövhələri nümayiş olunub.