İxtisara düşənlər üçün yeni şans: Üstünlük sistemi necə işləyəcək?
Azərbaycanın dövlət qurumlarında aparılan struktur dəyişiklikləri işçilərin mövqelərinə birbaşa təsir göstərir. Belə ki, ixtisara düşən şəxslərin yenidən təyinatı üçün xüsusi üstünlüklər sistemi formalaşdırılıb.
Bu sistem uzunmüddətli dövlət qulluqçularını və müəyyən sosial qrupları prioritetləşdirir. İctimaiyyət arasında isə prosesin şəffaflığı və ədalətliliyi əsas müzakirə mövzusuna çevrilib.
Bu barədə Crossmedia.az-a danışan hüquqşünas Ramil Süleymanov qanunları xatırladaraq bildirib:
"Dövlət qulluğu haqqında Azərbaycan Respublikasının qanununda göstərilir ki, 21.1.6-cı maddəyə uyğun olaraq dövlət orqanları ləğv olunarsa və ya ştatlar ixtisara düşərsə, dövlət qulluqçularına onların vəzifə və maaşına uyğun olaraq digər dövlət qurumlarında uyğun vəzifə tutmaqda üstünlük tanınır.
Eyni zamanda dövlət qulluğu haqqında Azərbaycan Respublikasının Qanununun 29.3-cü maddəsinə görə dövlət orqanlarının ləğvi və ya dövlət qulluqçularının sayının və ya ştatlarının ixtisarı ilə əlaqədar həmin şəxslər ehtiyat kadrlar siyahısına daxil olunur və onlar keçiriləcək müsahibələrdə iştirak etmək hüququna malikdirlər".
R.Süleymanov Dövlət qulluğuna xitam verilməsi ilə bağlı mövzuya da toxunub:
"Dövlət qulluqçularının sayı və ya ştatları ixtisar olunduqda dövlət qulluğuna xitam verilir.
Həmçinin, dövlət orqanlarının ləğv olunması və ya ixtisara düşməsi ilə əlaqədar dövlət qulluğu haqqında qanunun 21.1.6-cı maddəsinə uyğun olaraq üstünlüyün müəyyən olunması qaydaları Azərbaycan Respublikası Prezidentinin 2011-ci il tarixli fərmanı ilə müəyyən olunmuşdur.
Həmin fərmana görə, ixtisara düşən və ya ştatı ləğv olunan dövlət qulluqçuları peşəkarlığı və idarəçilik təcrübəsi nəzərə alınmaqla yenidən vakant vəzifələrə təyin olunurlar və vakant vəzifələrə təyin olunan şəxslər aşağıdakı kateqoriyalar üzrə ardıcıllıqla yerləşdirilir:
şəhid ailəsi üzvləri, müharibə iştirakçıları, 10 il dövlət qulluğunda stajı olan şəxslər, hərbi qulluqçuların və zabitlərin arvadları və ya ərləri, həmçinin öhdəsində 16 yaşınadək iki və ya daha çox uşağı olan şəxslər.
Bunlar ardıcıllıqla yerləşdirilir. Həmin fərmanda göstərilən qaydalara uyğun olaraq dövlət qulluqçularının yerləşdirilməsi həyata keçirilir".
Fatimə Məmmədova
15:54 02.03.2026
Oxunuş sayı: 656
