“Vyetnam” adlanan qəsəbənin 57 illik mübarizəsi: Gədəbəyin unudulmayan kəndi
1969-cu ildə Gədəbəy rayonunun Hacılar kəndi sovet hakimiyyəti tərəfindən ermənilərə verildi.Kənddə yerləşən 24 ev çox böyük əzab əziyyətlə köç etməyə məcbur qaldılar. Lakin kəndin məğrur sakinləri birləşərək, bu işğala etiraz etdi.
Bir qrup Bakıya gələrək dövrün birinci katibi Vəli Axundova öz etirazlarını bildirdi, nümayişlər keçirdilər. Daha sonra Moskvaya gedib orada öz etirazlarını bildirdilər. Lakin məsələ ilə bağlı heç bir həll görülmədi. Çarəsiz qalan əhali Qızılqaya kəndi yaxınlığında bir qəsəbə saldı. Qəsəbənin adı da simvolik olaraq qeyri-rəsmi " Vyetnam" qoyuldu.
Ona görə ki, vaxtilə Vyetnam da ABŞ-a qarşı dəyanətli mübarizə nümayiş etdirmişdi. Qəsəbə sakinləri hər zaman qəsəbənin infrastrukturunun zəifliyindən şikayət edirdilər. Oradan keçən çayın tez-tez daşması həm sakinlərə həm də məktəbə gedən şagirdlərə ciddi maneələr yaradırdı. Bu problem də həll olunmurdu.
Yalnız keçən il prezident İlham Əliyevin müvafiq sərəncamına əsasən qəsəbədə abadlıq işlərinə başlanıldı. Və qəsəbə sakinlərini ən çox narahat edən məsələlərdən biri - körpü məsələsi də - öz həllini tapdı.
Çay üzərində salınan möhkəm körpü qəsəbə sakinlərinin işini asanlaşdırdı. Çünki tez-tez daşan çay insanların hərəkətinə maneə törədir, məktəblilərin davamiyyətinə mane olurdu.
Crossmedia.az kənddə abadlıq işləri aparan North West şirkətinin ərazi üzrə sahə rəisi Akif Dərvişov ilə əlaqə saxlayıb:
"Biz bu kəndlərdə mülki infrastruktur layihələri həyata keçiririk. Üç kəndin yollarının təmiri ilə bağlı işlər aparılıb. Bu layihələr şirkətimiz tərəfindən icra olunur. Layihə rəhbərimiz də müvafiq göstərişləri verib. Mən isə sahə rəisi kimi əsasən körpünün tikintisində iştirak edən şəxslərdən biriyəm.
Eyni zamanda yolun çəkilməsi, körpünün ətrafının doldurulması və abadlaşdırılması işlərini də icra etmişik. Artıq iki ilə yaxındır ki, bu ərazidə fəaliyyət göstəririk və kənd sakinləri ilə mütəmadi ünsiyyətdə oluruq.
Sakinlər bildirirlər ki, uzun illər bu kəndə körpü salınması üçün müxtəlif qurumlara müraciətlər ediblər, xahişlər ediblər, lakin nəticə əldə olunmayıb. Dəfələrlə söz verilsə də, körpü tikilməyib.
Nəhayət, şirkətimizin direktoru tərəfindən qərar qəbul olundu və bu körpü inşa edildi. Gələcək planlara gəlincə, şirkətimiz bundan sonra da ərazidə layihələr həyata keçirməyi planlaşdırır. Hazırda Gədəbəy istiqamətində bir-iki yarımçıq işimiz qalıb, onları yekunlaşdırırıq. Kiçik həcmli işlər tamamlandıqdan sonra Tovuz və ətraf ərazilərdə fəaliyyətimizi davam etdirməyi nəzərdə tuturuq".
Ayhan
10:54 02.03.2026
Oxunuş sayı: 639
