Azərbaycanın Ukraynaya yardımına kimsə irad bildirə bilməz, çünki...- Arzu Nağıyev
Azərbaycanın beynəlxalq humanitar siyasəti konkret addımlar və davamlı təşəbbüslər üzərində qurulmuş ardıcıl xətt kimi diqqət çəkir. Xüsusilə münaqişə və enerji təhlükəsizliyi problemləri ilə üzləşən ölkələrə göstərilən dəstək Azərbaycanın qlobal məsuliyyət anlayışının praktik təzahürü hesab olunur. Bu yanaşma təkcə siyasi mövqenin deyil, həm də humanitar dəyərlərə sadiqliyin ifadəsi kimi çıxış edir.
Bu çərçivədə Ukraynaya göndərilən növbəti humanitar yardım paketi Azərbaycanın enerji sahəsində malik olduğu potensialın beynəlxalq həmrəylik məqsədlərinə yönəldilməsinin bariz nümunəsidir. Elektrik təchizatının bərpasına xidmət edən avadanlıqların Ukraynaya çatdırılması, həm qısa müddətli ehtiyacların ödənilməsi, həm də uzunmüddətli sabitliyin təmin olunması baxımından mühüm əhəmiyyət daşıyır və Azərbaycanın humanitar dəstəyinin davamlı xarakterini bir daha təsdiqləyir.
Məsələ ilə bağlı Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev Crossmedia.az-la öz fikirlərini bölüşüb:
"Beynəlxalq səviyyədə də qəbul olunur ki, Azərbaycan emosional deyil, rasional diplomatiya aparıb. Humanitar yardım göstərməklə Azərbaycan daim öz imicini və sülhsevər missiyasını qoruyub.
Rusiya ilə münasibətlərdə, təbii ki, qarşılıqlı maraqlar çərçivəsində sabitlik qorunur. Bu balans bu gün də regionda və dünyada qəbul olunan bir məsələdir. Çox nadir hallarda belə addımlar atılır. Lakin bu, uğurlu Azərbaycanın xarici siyasət modelidir.
Məlum məsələdir ki, Azərbaycanın Ukraynaya göndərdiyi yük humanitar yardımdır. Bu, ilk növbədə humanizm, beynəlxalq hüquq və mülki əhalinin müdafiəsi mövqeyini ortaya qoyur. Bu, hərbi yardım deyil, kiminsə hərbi tərəfini tutmaq deyil, sadəcə olaraq insani məsuliyyətin yerinə yetirilməsidir".
O bildirib ki, Azərbaycan Rusiya ilə münasibətlərdə qarşılıqlı hörmət, strateji dialoq və regional sabitlik xəttini də qoruyur: "Məlumdur ki, Azərbaycan bu siyasəti bir neçə istiqamətdə aparır: beynəlxalq hüquqa söykənən mövqeyi var, humanitar diplomatiya yürüdür, prinsipal neytrallıq nümayiş etdirir və, təbii ki, Rusiya ilə açıq və işlək dialoqu davam etdirir.
Yəni burada Azərbaycan Moskva ilə enerji təhlükəsizliyi, regional nəqliyyat və iqtisadi sahələrdə əməkdaşlığını davam etdirməklə bərabər, humanitar mövqeyini balansdan çıxma kimi Rusiya qəbul edə bilməz. Bu, müstəqil siyasətimizin tərkib hissəsi kimi qəbul edilir və Ukrayna ilə bağlı mövqe də vaxtilə Azərbaycanın özünə münasibətdə tətbiq olunan prinsiplərlə eynidir.
Niyə? Çünki Azərbaycan bütün münaqişələrdə dövlətlərin ərazi bütövlüyü prinsipini daim əsas götürüb və bu gün də həmin prinsipdən çıxış edir. Biz heç bir bloklaşmaya qoşulmuruq, münaqişələrdə silah tədarükü kimi hərbi mövqedən çıxış etmirik. Tərəflərdən heç birinə qarşı açıq düşmənçilik aparmırıq".
Deputat həmçinin Ukraynaya edilən yardımların siyasi deyil, humanitar xarakter daşıdığını qeyd edib:
"Bu, Azərbaycanın özünün də otuz illik işğal və humanitar fəlakət təcrübəsindən qaynaqlanan mövqedir. Odur ki, kimsə buna irad tuta bilməz. Biz ərazi bütövlüyümüzü, suverenliyimizi, vətəndaşlarımızın rifahını və xarici siyasətdə sülh məramlı missiyamızı, humanitar məsələləri daim yerinə yetirən bir dövlətik".
10:13 22.01.2026
Oxunuş sayı: 1845
