Azərbaycanın beynəlxalq mövqeyi və inkişafı – Prezident İlham Əliyevin müsahibəsi
Azərbaycan Prezidenti cənab İlham Əliyev hər ilin əvvəlində olduğu kimi, bu il də yerli televiziya kanallarına müsahibə verərək ölkənin uğurları və gələcək prioritetləri barədə ictimaiyyətə ətraflı məlumat verdi. Dövlət başçısı vurğuladı ki, bu görüşlər ənənəvi xarakter daşıyır və həm ölkənin ilin yekunları barədə məlumat vermək, həm də öz fikirlərini bir daha bölüşmək üçün vacib imkan yaradır. O qeyd etdi ki, ictimaiyyətlə birbaşa ünsiyyət qurmaq Azərbaycanın siyasi həyatında vacib elementdir və bu, dövlətin şəffaflığını göstərir.
Prezident İlham Əliyev bildirdi ki, 2025-ci il Azərbaycan-Amerika münasibətləri baxımından tarixi əhəmiyyət daşıyır. Bu il Amerika ilə strateji işçi qrupunun yaradılması sənədi imzalanmış, eyni zamanda Zəngəzur dəhlizinin açılması Amerika Prezidenti tərəfindən təsdiqlənmişdir. Dövlət başçısı vurğuladı ki, Azərbaycanla Amerika arasındakı əlaqələr praktik və nəticəyə hesablanmış şəkildə inkişaf edir, əməkdaşlıq konkret layihələrə və real nəticələrə əsaslanır. Bu, ölkəmizin beynəlxalq aləmdə etibarlı tərəfdaş kimi tanınmasının göstəricisidir.
Prezident İlham Əliyev keçmiş AXC-Müsavat hakimiyyətini sərt tənqid edərək bildirdi ki, o dövrdə ölkəni idarə edən şəxslər peşəkar deyildilər və təsadüfi insanlar hakimiyyəti zəbt etmişdilər. Bu, Azərbaycanın inkişafına ciddi zərbə vurmuş və ölkəni riskə atmışdır. Dövlət başçısı qeyd etdi ki, Azərbaycan uzun illər çalışaraq 907-ci düzəlişi ləğv etməyə səy göstərmişdir və Tramp administrasiyasının hakimiyyətə gəlməsi ilə situasiya tamamilə dəyişmişdir.
Xarici siyasət sahəsində də 2025-ci il bir sıra önəmli nailiyyətlərlə yadda qalıb. Prezident İlham Əliyev bildirdi ki, Çinlə strateji tərəfdaşlıq möhkəmlənməkdədir, iki ölkə arasında əmtəə dövriyyəsi artıq 4 milyard dolları keçib və Çin şirkətləri bərpaolunan enerji mənbələrinə böyük investisiyalar qoyur. Bu, Azərbaycanın beynəlxalq enerji və iqtisadi layihələrdə əsas tərəfdaş kimi mövqeyini gücləndirir.
Prezident İlham Əliyev həmçinin Azərbaycanın beynəlxalq təşkilatlardakı uğurlarına toxundu. Azərbaycan D-8 təşkilatına üzv olmuş və Mərkəzi Asiya Məşvərət Şurasına tamhüquqlu üzv seçilmişdir. Bu, ölkəmizin regionda və qlobal səviyyədə nüfuzunu artıran strateji addımlardan biridir. İşğaldan azad edilmiş rayonlar isə artıq beynəlxalq tədbirlər üçün mərkəzə çevrilmiş, bölgə iqtisadi və siyasi baxımdan fəallaşmışdır. Qəbələdə keçirilən Türk Dövlətləri Təşkilatının Sammitində türk dövlətləri arasında hərbi əməkdaşlıq elementinə dair təklif irəli sürülmüş, bu da regional təhlükəsizlik və əməkdaşlığın gücləndirilməsinə xidmət edir.
Prezident İlham Əliyev vurğuladı ki, Azərbaycan gücünü, o cümlədən hərbi potensialını artırır, ölkənin böyüklüyü, müdrikliyi və məsuliyyəti hər kəsin diqqətindədir. Dövlət başçısı qeyd etdi ki, Azərbaycanın strateji mövqeyi, güclü diplomatiya və müasir iqtisadi islahatlar regionda ölkəmizi etibarlı tərəfdaş və lider dövlət kimi tanıdır.
Bu müsahibə göstərir ki, Azərbaycan həm daxildə, həm də beynəlxalq aləmdə öz mövqeyini gücləndirir, strateji tərəfdaşlıqlarını genişləndirir və regionda etibarlı dövlət kimi tanınır. Eyni zamanda dövlət başçısı ictimaiyyətə mesaj verdi ki, ölkəmiz həm iqtisadi, həm hərbi, həm də diplomatik baxımdan inkişaf etməkdədir və Azərbaycan vətəndaşlarının rifahını yüksəltmək daim prioritet olaraq qalır.
Nərmin Azadova
“H.B. Zərdabi küç. 96” (Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi) ünvanı üzrə ərazi partiya təşkilatının sədr müavini
14:20 08.01.2026
Oxunuş sayı: 7771
