Sosium

Azərbaycanın gələcək yol xəritəsi

Yanvarın 5-i Azərbaycan informasiya mühitində adi media günlərindən biri kimi deyil, xüsusi məna daşıyan bir tarix kimi yadda qaldı. Həmin gün televiziya ekranlarından səslənən fikirlər klassik müsahibə çərçivəsindən kənara çıxaraq milli iradənin, dövlət məsuliyyətinin və siyasi qətiyyətin açıq təzahürünə çevrildi. Azərbaycan Respublikasının Prezidenti cənab İlham Əliyevin yerli televiziya kanallarına verdiyi müsahibə, mahiyyət etibarilə, müasir Azərbaycan dövlətçiliyinin açıq, prinsipial, milli maraqlara əsaslanan və gələcəyə hesablanmış siyasi portretini ortaya qoydu.

Bu müsahibə bir daha təsdiqlədi ki, cənab Prezident İlham Əliyev üçün siyasi dialoq sadəcə diplomatik ünsiyyət forması deyil, xalqla birbaşa əlaqə, dövlətin şəffaflığı və lider məsuliyyətinin real ifadəsidir. Dövlət başçısı ekran qarşısında təkcə ünvanlanan suallara cavab vermirdi; o, eyni zamanda baş verən proseslərin mahiyyətini izah edir, qəbul edilən qərarların səbəblərini açıqlayır və Azərbaycanın gələcək inkişaf istiqamətlərini aydın konturlarla təqdim edirdi. Müsahibə boyunca qətiyyətli mövqe və faktlara əsaslanan yanaşma özünü açıq şəkildə göstərirdi.

Cənab Prezidentin müsahibə zamanı seçdiyi üslub xüsusi diqqət çəkirdi. Burada emosional çağırışlara deyil, dəqiq arqumentlərə, fərziyyələrə yox, real faktlara, populizmə deyil, məsuliyyətli siyasi mövqeyə üstünlük verilirdi. Bu yanaşma Prezident İlham Əliyevin liderlik modelinin əsas mahiyyətini bir daha üzə çıxardı. Bu modeldə verilən sözlər konkret addımlara çevrilir, niyyətlər nəticə doğurur, strateji xətt isə real uğurlarla təsdiqlənir.

Dövlət başçısının çıxışında vurğulanan əsas ideya aydın idi: Azərbaycan öz taleyinin sahibidir. Bu fikir sadəcə siyasi bəyanat deyil, uzun illər ərzində həyata keçirilən məqsədyönlü siyasətin formalaşdırdığı real vəziyyətdir. Prezidentin fikirlərində Azərbaycanın regional proseslərdə kənardan izləyən deyil, proseslərin gedişinə təsir göstərən və oyun qaydalarını müəyyən edən əsas aktorlardan biri olduğu qətiyyətlə hiss olunurdu. Bu isə xalqla lider arasında mövcud olan birliyin siyasi ifadəsi kimi dəyərləndirilə bilər.

Müsahibə eyni zamanda Prezidentlə cəmiyyət arasında formalaşmış etimad münasibətlərinin növbəti təsdiqi oldu. Cənab Prezident İlham Əliyevin televiziya vasitəsilə birbaşa xalqa müraciət etməsi, ictimaiyyəti narahat edən məsələlərə toxunması və açıq mövqe sərgiləməsi göstərdi ki, mövcud hakimiyyət cəmiyyətin səsini eşidir və onunla dialoqu davamlı şəkildə qoruyur. Burada diqqət çəkən mühüm məqamlardan biri də ondan ibarət idi ki, dövlət başçısı yalnız mövcud vəziyyəti təhlil etməklə kifayətlənmədi, eyni zamanda qarşıdakı dövr üçün strateji baxışını da ortaya qoydu. Bu baxışda sosial rifahın yüksəldilməsi, dövlət institutlarının möhkəmləndirilməsi, milli təhlükəsizliyin təmin olunması və Azərbaycanın beynəlxalq mövqelərinin daha da gücləndirilməsi əsas prioritetlər kimi ön plana çəkildi.

İnformasiya müharibələrinin getdikcə dərinləşdiyi müasir şəraitdə cənab Prezident İlham Əliyevin yerli televiziya kanallarına verdiyi müsahibə milli informasiya siyasətinin prinsipial xəttini də aydın şəkildə nümayiş etdirdi. Dövlət başçısı bir daha vurğuladı ki, Azərbaycan həqiqətləri kənar və təhrif olunmuş mənbələr vasitəsilə deyil, birbaşa dövlətin mövqeyindən cəmiyyətə çatdırılmalıdır. Bu yanaşma milli medianın roluna verilən yüksək dəyərin göstəricisi idi. Yerli televiziya kanalları vasitəsilə səsləndirilən bu fikirlər ictimaiyyətin vahid informasiya məkanında doğru və dolğun şəkildə məlumatlandırılmasına xidmət etdi.

Cənab Prezident İlham Əliyevin yanvarın 5-də verdiyi müsahibə eyni zamanda Azərbaycan dövlətçilik məktəbinin davamlılığını əks etdirdi. Ulu Öndər Heydər Əliyevin əsasını qoyduğu siyasi kursun bu gün müasir çağırışlara uyğun şəkildə davam etdirilməsi dövlət başçısının fikirlərində aydın şəkildə hiss olunurdu. Məhz bu siyasi davamlılıq ölkədə sabitliyin, inkişafın və milli birliyin əsas təminatçısı kimi çıxış edir. Bu baxımdan, müsahibə yalnız cari hadisələrə münasibət deyil, eyni zamanda keçmişlə gələcək arasında qurulan strateji bir körpü idi. Həmin körpünün bir ucunda tarixi təcrübə, digər ucunda isə güclü, müstəqil və iddialı Azərbaycan dayanırdı.

Yanvarın 5-də yerli televiziya kanallarında səsləndirilən fikirlər yalnız efir vaxtı ilə məhdudlaşmadı. Onlar ictimai yaddaşda, siyasi arxivlərdə və dövlət tarixində öz layiqli yerini tutdu. Çünki bu fikirlər situativ cavablar deyil, dövlət düşüncəsinin ardıcıl və sistemli ifadəsi idi. Cənab Prezident İlham Əliyevin yerli televiziya kanallarına verdiyi bu müsahibə bir daha göstərdi ki, Azərbaycanın rəhbəri təkcə bu günün suallarına cavab vermir, eyni zamanda sabahın konturlarını da özü müəyyənləşdirir.