Sülhün əldə edilməsi Cənubi Qafqaz üçün ciddi iqtisadi dividendlər vəd edir -DEPUTAT
Azərbaycan Prezident İlham Əliyev yanvarın 4-də ABŞ nümayəndə heyətini qəbul edərkən regional sülh gündəliyinin irəli aparılması üçün ölkəmizin bundan sonra da səylərini davam etdirəcəyini bildirib.
Dövlətimizin başçısı artıq Azərbaycanla Ermənistan arasında ticarət münasibətlərinin yaradıldığını deyərək, bu xüsusda Azərbaycanın neft məhsullarının Ermənistana ixrac edildiyini, həmçinin Qazaxıstan və Rusiyadan buğdanın Azərbaycan ərazisindən keçməklə Ermənistana ixracının həyata keçirildiyini vurğuladı. Prezident İlham Əliyev TRİPP dəhlizinin regional nəqliyyat bağlantıları baxımından yeni imkanlar yaradacağına ümidvarlığını bildirdi.
Cənubi Qafqazda uzun illər davam edən gərginlik fonunda sülh və əməkdaşlıq mövzusu yenidən gündəmin əsas xəttinə çevrilib. Regionda yeni siyasi və iqtisadi reallıqlar formalaşdığı bir vaxtda Azərbaycan atdığı ardıcıl və praqmatik addımlarla dayanıqlı sülhün qurulmasına yönəlmiş əsas aktorlardan biri kimi çıxış edir. Rəsmi Bakının tranzit, enerji və kommunikasiya sahələrində irəli sürdüyü təşəbbüslər isə təkcə ikitərəfli münasibətlər deyil, bütövlükdə regionun gələcək inkişaf perspektivləri baxımından xüsusi əhəmiyyət daşıyır.
Milli Məclisin deputatı Vüqar Bayramov dövlət başçısının səsləndirdiyi fikirlər barədə Crossmedia.az-a açıqlama verib: "Azərbaycan regional sülhün təmin olunmasına töhfə verən ölkələrdəndir. Nəzərə almaq lazımdır ki, Azərbaycan sülh təşəbbüslərinə sadiqdir. Bu, Cənubi Qafqaz və Mərkəzi Asiya dövlətlərinin nümayəndə heyətləri ilə keçirilən görüşlərdə də xüsusi olaraq vurğulanıb. Bir tərəfdən, Azərbaycan 37 ildən sonra Ermənistanın yüklərinin Azərbaycan ərazisi üzərindən tranzit daşınmasına qoyulmuş bütün qadağaları aradan qaldırdı. Bu addım regionda sülhün əldə olunması və etimad mühitinin formalaşdırılması baxımından ciddi irəliləyiş kimi qiymətləndirilir və Ermənistan tərəfindən də müsbət qarşılanıb. Eyni zamanda, Azərbaycanın benzin və digər enerji məhsullarının Ermənistan bazarına çıxarılması iqtisadi əlaqələrin bərpasına yönəlmiş mühüm addımdır. Bu təşəbbüslər ümumilikdə Cənubi Qafqaz regionunda sülhün möhkəmlənməsinə və əməkdaşlıq mühitinin gücləndirilməsinə xidmət edir".
Deputat əlavə edib ki, Azərbaycanın atdığı bu addımlar bir tərəfdən uzunmüddətli sülhün təmin olunmasına, digər tərəfdən isə regionun iqtisadi inkişafına hesablanıb: "Bu proses region üçün inklüziv inkişaf modeli kimi xarakterizə oluna bilər. Növbəti mərhələdə də Azərbaycan sülh strategiyasına uyğun olaraq bu istiqamətdə fəaliyyətini davam etdirəcək. Ölkə regionda münaqişələrin aradan qaldırılmasında, dayanıqlı sülhün bərqərar olunmasında maraqlıdır. Sülhün əldə edilməsi region ölkələri üçün ciddi iqtisadi dividendlər vəd edir və bu, ümumi iqtisadi inkişafı stimullaşdıracaq. Xüsusilə nəqliyyat və kommunikasiya xətlərinin bərpası Zəngəzur istiqamətində əlaqələrin açılmasına, regionda sabitliyin və təhlükəsizliyin möhkəmlənməsinə xidmət edəcək".
Ayhan
12:54 05.01.2026
Oxunuş sayı: 1765
