Rusiya AZAL faciəsi ilə bağlı məsuliyyətdən qaçmağa çalışır
Son günlər AZAL-a məxsus təyyarənin qəzaya uğraması ilə bağlı yeni və ziddiyyətli iddialar gündəmə gəlib. Anonim mənbədən yayılan sənəd hadisənin səbəbləri və məsuliyyət məsələsi ətrafında ciddi suallar doğurur.
Crossmedia.az xəbər verir ki, BT News kanalının botuna anonim hesabdan AZAL-a məxsus təyyarənin vurulması ilə bağlı insidentə dair sənəd göndərilib.
Sənədin məzmununa görə, o, Rusiya Federasiyasının İstintaq Komitəsi tərəfindən tərtib edilib və Azərbaycan Respublikasının Baş Prokurorluğuna ünvanlanıb. Sənəddə iddia olunur ki, AZAL təyyarəsi əlverişsiz hava şəraiti səbəbindən Rusiya ərazisində eniş edə bilməyib və sonradan eniş zamanı yerə çırpılıb. Bu əsasla cinayət işinə xitam verildiyi bildirilir.
Bu cür ifadələr baş vermiş faciəyə görə məsuliyyətdən yayınmaq cəhdi kimi görünür. Haqlı sual yaranır: faktiki olaraq məsuliyyət “hava şəraiti”nin üzərinə atıldığı halda, Rusiya İstintaq Komitəsi hansı əsasla cinayət işinə xitam verir?
Bu halda belə çıxır ki, insanların həlak olmasına görə heç kim məsuliyyətə cəlb edilməyəcək. Halbuki faciəyə görə məsuliyyət məhz Rusiya tərəfinin üzərinə düşür: AZAL təyyarəsi “Pantsir-S1” hava hücumundan müdafiə kompleksi tərəfindən raketlə vurulub və bundan sonra Aktau hava limanı ərazisində deyil, onun yaxınlığında qəzaya uğrayıb. Sənəddə isə hadisə təyyarənin guya birbaşa hava limanında qəzaya uğraması kimi təqdim edilir.
Sənədin məzmunu Rusiya Prezidenti Vladimir Putinin 9 oktyabr tarixində Düşənbədə MDB Dövlət Başçıları Şurasının iclası çərçivəsində səsləndirdiyi rəsmi mövqe ilə birbaşa ziddiyyət təşkil edir. Həmin vaxt Putin AZAL-a məxsus mülki təyyarənin Rusiya Silahlı Qüvvələrinin HHM sisteminin fəaliyyəti nəticəsində qəzaya uğradığını etiraf etmiş və “belə hallarda tələb olunan hər şeyi etməyə” hazır olduqlarını bildirmişdi.
Lakin “tələb olunan hər şey”, ilk növbədə, günahkarların müəyyənləşdirilməsi və onların məsuliyyətə cəlb olunması deməkdir. Cinayət işinə xitam verilməsi isə buna qətiyyən uyğun gəlmir.
Qeyd edək ki, sözügedən sənədin həqiqiliyi təsdiqlənməyib. Mənbənin anonim olması nəzərə alınaraq, onun yayılmasında Ukrayna tərəfinin mümkün iştirakı da istisna edilmir.
Zeynəb Xuduyeva
21:07 06.01.2026
Oxunuş sayı: 2168
