ABŞ bu məsələdə də Azərbaycana kömək edəcək: İrandan narkotik qaçaqmalçılığına son qoyulur
Qlobal təhlükəsizlik arxitekturasının mürəkkəbləşdiyi, regional risk və çağırışların artdığı bir dövrdə dövlətlər arasında müdafiə və hərbi sahədə əməkdaşlıq xüsusi strateji əhəmiyyət daşıyır. Bu kontekstdə Azərbaycanla ABŞ arasında formalaşmış münasibətlər qarşılıqlı maraqlara əsaslanan, uzunmüddətli tərəfdaşlıq modeli kimi diqqət çəkir. İki ölkə arasında siyasi dialoqla yanaşı, hərbi, hərbi-texniki və hərbi təhsil sahələrində qurulan əməkdaşlıq mexanizmləri regional sabitliyin möhkəmləndirilməsinə xidmət edir.
Məhz bu strateji xəttin davamı olaraq yanvarın 4-də Azərbaycanın müdafiə naziri general-polkovnik Zakir Həsənovun ölkəmizdə səfərdə olan ABŞ Senatının Silahlı Qüvvələr Komitəsinin üzvü Markveyn Mallin və Nümayəndələr Palatasının digər üzvləri ilə keçirdiyi görüş tərəflər arasında qarşılıqlı anlaşmanın və dialoqun dərinləşdirilməsi baxımından mühüm hadisə kimi qiymətləndirilir. Görüş çərçivəsində mövcud əməkdaşlığın cari vəziyyəti, yeni imkanlar və inkişaf perspektivləri ətrafında ətraflı fikir mübadiləsi aparılması Azərbaycan–ABŞ münasibətlərinin gələcək mərhələsinə dair mühüm mesajlar verib.
Bu konteksdə iki ölkə arasında hərbi əməkdaşlığın inkişafı barədə Crossmedia.az-a danışan hərbi ekspert Ədalət Verdiyev söyləyib ki, bu əməkdaşlıq bir çox sahəni əhatə edir və xüsusilə milli təhlükəsizlik, ərazi bütövlüyü, suverenlik və terrorizmə qarşı mübarizə sahələrində uğurla davam edir: "Bu əməkdaşlığın tarixi Azərbaycanın müstəqilliyini əldə etdiyi ilk illərə dayanır. Ölkələrimiz bir çox beynəlxalq platformalarda, xüsusilə NATO çərçivəsində, Sülh Naminə Tərəfdaşlıq Proqramında və digər birgə hərbi təlimlərdə birgə fəaliyyət göstərərək sülh və təhlükəsizliyin təmin olunmasında əhəmiyyətli rol oynayıb. 2003-cü ildə terrorizmə qarşı mübarizədə Azərbaycan ABŞ-ın təşəbbüslərinə dəstək verən ilk ölkələrdən biri olub. Son illərdə, xüsusilə ABŞ-da Donald Trampın hakimiyyətə gəldiyi dövrdən başlayaraq, ölkələrimiz arasında əməkdaşlıq üçün daha geniş platformalar yaradılıb. Hazırda əməkdaşlıq sahələri iqtisadiyyat, energetika, müdafiə, müdafiə sənayesi, hərbi təhsil, informasiya texnologiyaları, süni intellekt və digər strateji sahələri əhatə edir. Bu istiqamətlərdə əməkdaşlığın genişləndirilməsi məqsədilə mütəmadi olaraq birgə məsləhətləşmələr aparılır və hər iki ölkənin hökumətləri arasında strateji işçi qruplar fəaliyyət göstərir. Azərbaycanla ABŞ arasında müdafiə sahəsində, o cümlədən müdafiə məhsullarının satışı və hərbi texnologiyaların transferi sahəsində əməkdaşlıq da nəzərdə tutulur. 907-ci düzəlişin üzəlişin ləğvi bu proseslərin sürətlənməsinə təkan verəcək. ABŞ tranzit yolların, xüsusilə Zəngəzur dəhlizinin açılmasını diqqətlə izlənilir. Bu istiqamətdə müvafiq qərarlar qəbul edilib".
Ekspert, həmçinin perspektivlərdən birinin də Xəzər dənizində təhlükəsizliyin təmin olunması olduğunu bildirib: "Xüsusilə İran istiqamətindən Azərbaycan ərazisi və digər ölkələrə narkotik vasitələrin qaçaqmalçılıq yolu ilə daşınmasının qarşısının alınması məsələləri aktualdır. ABŞ əvvəllər bu sahədə Dövlət Sərhəd Xidməti ilə yaxından əməkdaşlıq edib. Hərbi və müdafiə sənayesi sahəsində əməkdaşlığın genişləndirilməsi üçün kifayət qədər imkanlar mövcuddur və hər iki ölkə bu imkanlardan maksimum istifadə edərək gələcəkdə əməkdaşlığı daha da dərinləşdirəcək".
Elmir Heydərli
12:42 05.01.2026
Oxunuş sayı: 21302
