Azərbaycan Rusiya- Ukrayna müharibəsi ilə konkret mövqe ortaya qoyur: Tərəf seçiləcək?
Azərbaycan xarici işlər naziri Ceyhun Bayramov ilin yekunlarına dair mətbuat konfransında jurnalistlərin suallarını cavablandırarkən deyib ki, Azərbaycanın Rusiya-Ukrayna müharibəsindən sonrakı addımları müharibənin bitmə şərtlərindən asılı olacaq.
O qeyd edib ki, Rusiya-Ukrayna müharibəsi, Rusiya və Qərb arasında münasibətlər, Moskvaya qarşı sanksiyaların davam edib-etməməsi, Ukraynanın təhlükəsizliyi, bərpası ilə bağlı müəyyən mövzular var ki, bunları bilmədən fərziyyələr irəli sürmək düzgün deyil:
"Bizim ən böyük istəyimiz odur ki, Rusiya-Ukrayna müharibəsi tez bir zamanda başa çatsın. Bu, böyük faciədir. Miqyası, həlak olan insanların sayı, dağıdılmış şəhər və kəndlər, infrastruktur baxımından böyük faciədir. Biz arzu edərdik ki, 2026 və ya tez bir zamanda müharibə başa çatsın. Ondan sonrakı proseslərdə Azərbaycan nə etməlidir, sualına gəlincə, bu müharibənin başa çatacağı şərtlərdən asılıdır".
Rusiya–Ukrayna müharibəsinin mümkün nəticələri və onun regional geosiyasətə təsiri ilə bağlı qeyri-müəyyənliklər davam etdiyi bir şəraitdə Azərbaycanın mövqeyi də diqqət mərkəzindədir. Münaqişənin hansı şərtlərlə başa çatacağı, Rusiya ilə Qərb arasında münasibətlərin hansı istiqamətdə inkişaf edəcəyi, Moskvaya qarşı tətbiq olunan sanksiyaların taleyi, eləcə də Ukraynanın təhlükəsizliyi və bərpa prosesi hələlik açıq suallar olaraq qalır. Məhz bu qeyri-müəyyənliklər fonunda Azərbaycanın müharibədən sonrakı dövrdə atacağı addımların yalnız prosesin yekun nəticələrinə uyğun şəkildə müəyyənləşdiriləcəyi rəsmi Bakı tərəfindən bir daha vurğulanıb.
Bu barədə Crossmedia.az-a danışan Ağ Partiya sədri Tural Abbaslı söyləyib ki, müharibə hələ başa çatmayıb və onun hansı şərtlərlə yekunlaşacağı məlum deyil: "Bu prosesdə Qərbin mövqeyi necə olacaq, ABŞ hansı xətti tutacaq, Ukrayna öz ərazi bütövlüyünü təmin edə biləcəkmi, yoxsa bilməyəcəkmi – bütün bu suallar hələ açıq qalır. Eyni zamanda, Rusiya hansı əraziləri işğal altında saxlayacaq, yoxsa işğaldan tam şəkildə geri çəkiləcək – bunlar da qeyri-müəyyəndir. Bundan başqa, beynəlxalq arenada müharibənin yekunlaşmasına hansı münasibətin sərgilənəcəyi və mümkün razılaşmaya hansı şərtlərin daxil ediləcəyi də hələlik bəlli deyil. Bu qeyri-müəyyənliklər fonunda Azərbaycanın bu məsələyə indidən konkret və qəti münasibət bildirməsi ciddi və məntiqli olmazdı. Bununla yanaşı, Azərbaycan həm Rusiya, həm də Ukrayna ilə uzun illərə söykənən münasibətlər sisteminə malikdir. İnanmıram ki, müharibə atəşkəslə və ya sülhlə başa çatdıqdan sonra bu münasibətlər sistemində kəskin dəyişikliklər baş versin. Ola bilsin ki, müəyyən texniki və ya taktiki korrektələr edilsin, lakin fundamental xəttin dəyişməsi real görünmür. Üstəlik, Azərbaycanın hər iki dövlətə münasibəti bu müharibənin nəticəsindən deyil, həmin dövlətlərin Azərbaycanın maraqlarına və problemlərinə necə yanaşmasından asılı olmalıdır".
T.Abbaslı həmçinin əlavə edib ki, Rusiya və Ukraynanın Azərbaycanın regional və beynəlxalq məsələlərinə ayrı-ayrılıqda verdiyi münasibət, Bakı ilə münasibətlərin formalaşmasında əsas faktor olmalıdır: "Yəni üçüncü tərəflər arasında baş verən müharibə və onun nəticələri həlledici meyar kimi çıxış etməməlidir. Hər bir halda, münasibətlərin hansı istiqamətdə və hansı formada inkişaf edəcəyini demək üçün, xüsusilə müharibədən sonrakı dövr nəzərdə tutulursa, məhz həmin mərhələni gözləmək lazımdır. Bununla belə, Azərbaycanın bu günədək yeritmiş olduğu xarici siyasət göstərir ki, rəsmi Bakı kəskin və radikal addımlara meyilli deyil. Azərbaycan daha çox balanslı siyasət aparır, öz milli maraqlarını ön planda tutur və bu yanaşma da məhz belə olmalıdır. Görünən odur ki, Azərbaycan gələcək mərhələdə də öz maraqlarını və beynəlxalq mövqeyini uzlaşdıran, tarazlı və praqmatik xarici siyasət xəttini davam etdirəcək".
Ayhan
16:36 29.12.2025
Oxunuş sayı: 3826
