Azərbaycan COP təcrübəsini Türkiyə ilə bölüşəcək: Qardaşlığın növbəti təzahürü
Baş nazir Əli Əsədovun Azərbaycanın COP31-ə hazırlıq prosesində Türkiyəyə hərtərəfli dəstək göstərməyə hazır olduğunu bəyan etməsi iki qardaş ölkə arasında strateji tərəfdaşlığın və müttəfiqlik münasibətlərinin növbəti təzahürüdür. Son illər Azərbaycan və Türkiyə yalnız siyasi və hərbi sahədə deyil, eyni zamanda qlobal əhəmiyyətli məsələlərdə də bir-birinə dayaq olduqlarını praktik addımlarla sübut edirlər. Xüsusilə iqlim dəyişikliyi kimi beynəlxalq gündəmin əsas mövzularından birində bu əməkdaşlıq həm regional, həm də qlobal miqyasda diqqət çəkir. Bu kontekstdə Azərbaycanın Türkiyəyə göstərə biləcəyi dəstəyin mahiyyəti və bunun iki ölkə arasındakı qardaşlıq bağlarını dünya ictimaiyyətinə hansı mesajlarla təqdim edəcəyi xüsusi maraq doğurur.
Mövzu ilə bağlı Milli Məclisin deputatı Günay Ağamalı Crossmedia.az-a açıqlama verib: "Baş nazir Əli Əsədovun COP31-lə bağlı səsləndirdiyi mövqe Azərbaycan–Türkiyə qardaşlığının strateji mahiyyətini bir daha aydın şəkildə ortaya qoyur. Azərbaycan COP29-a ev sahibliyi etməklə əldə etdiyi təcrübəni, institusional potensialını və beynəlxalq əlaqələr şəbəkəsini Türkiyə ilə bölüşməyə tam hazırdır. Sözügedən dəstək COP31 çərçivəsində təşkilati hazırlıq, iqlim diplomatiyası, çoxtərəfli danışıqların aparılması, texniki və ekspert biliklərinin paylaşılması sahələrini əhatə edə bilər. Bilindiyi kimi, ölkəmiz COP 29 zamanı çox ciddi nailiyyətlərə imza atdı. İstər təşkilatçılıq, istərsə də qarşıya qoyulan hədəflə nail olmaq baxımından səmərəli mexanizm formalaşdırıldı. Təbii ki, COP29 zamanı Azərbaycanın formalaşdırdığı səmərəli koordinasiya mexanizmləri, inkişaf etməkdə olan ölkələrin maraqlarının qorunması istiqamətində ortaya qoyduğu prinsipial mövqe Türkiyə üçün faydalı olacaqdır. Eyni zamanda, yaşıl enerji, dayanıqlı inkişaf, iqlim maliyyəsi və regional əməkdaşlıq sahələrində ortaq təşəbbüslər iki ölkənin beynəlxalq nüfuzunu daha da gücləndirəcək".
Deputat əlavə edib ki, Azərbaycanın Türkiyəyə göstərəcəyi dəstək “bir millət, iki dövlət” fəlsəfəsinin beynəlxalq müstəvidə praktik təzahürü olacağını əminliklə deyə bilərik: "Bu əməkdaşlıq qardaşlığımızın sözlə deyil, real fəaliyyətlə nümayiş etdirildiyini bütün dünyaya göstərəcək və Türk dünyasının qlobal problemlərin həllində vahid mövqedən çıxış etmək gücünü bir daha təsdiqləyəcəkdir".
Ayhan
18:22 23.12.2025
Oxunuş sayı: 14431
