Türkiyədə tibbi təhsil sahəsində də uğurlu və müasir kadr hazırlığı həyata keçirilir - Ekspert
Azərbaycan və Türkiyə tələbələrinin hərbi, tibbi və digər sahələrdə bir-birinin ölkəsində qarşılıqlı təhsil almaları vacibdir.
Bunu deputat Siyavuş Novruzov Milli Məclisin plenar iclasında çıxışı zamanı deyib.
Bununla bağlı Crossmedia.az-a açığlama verən təhsil eksperti İlqar Orucov bildirib ki, Azərbaycanla Türkiyə arasındakı münasibətlər “bir millət, iki dövlət” konsepsiyası üzərində qurulub. “Bu əlaqələr bütün müstəvilərdə qarşılıqlı əməkdaşlıq və etimada əsaslanır. Mən də hesab edirəm ki, Azərbaycanla Türkiyə arasında istər hərbi əməkdaşlıq, istər təhsil, istərsə də tibb sahəsində çox yaxşı münasibətlər mövcuddur. Bu əlaqələrin daha da dərinləşdirilməsi hər iki tərəf üçün faydalı nəticələr verə bilər. Xüsusilə hərbi, tibbi və digər sahələr üzrə qarşılıqlı təhsil almanın vacibliyi böyük əhəmiyyət daşıyır. Bu, həm qarşılıqlı təcrübənin mənimsənilməsinə, həm də müasir yanaşmaların tətbiqinə imkan yaradır. Türkiyə hərbi sahədə böyük potensiala malik, güclü orduya sahib bir dövlətdir. Bu ölkədə hərbi təhsil yeni yanaşmalar və müasir texnologiyalar əsasında qurulub. İllərdir Azərbaycan və Türkiyə hərbi sahədə sıx əməkdaşlıq edir və bu əməkdaşlıq yüksək ixtisaslı zabit kadrların hazırlanmasında öz faydasını göstərib. Biz bunun real nəticələrini 44 günlük Vətən müharibəsi zamanı və antiterror əməliyyatları dövründə açıq şəkildə gördük. Hesab edirəm ki, Türkiyə kimi güclü orduya malik bir ölkənin hərbi təcrübəsini öyrənmək və mənimsəmək Azərbaycanın ordu quruculuğuna, eləcə də hərbi sənayenin inkişafına mühüm töhfə verə bilər. Bildiyimiz kimi, bu gün dünyada ən güclü investisiya məhz keyfiyyətli kadr hazırlığıdır. Kadr hazırlığının gücləndirilməsi Azərbaycan üçün də böyük strateji əhəmiyyət kəsb edir. Dövlət başçısı tərəfindən gənclərin yüksək səviyyədə təhsil almasına yönəlmiş ardıcıl proqramlar və sənədlər qəbul olunur. Təkcə hərbi sahədə deyil, eyni zamanda tibb və digər sahələr üzrə də qarşılıqlı təhsil və təcrübə mübadiləsinin vacibliyi xüsusi önəm daşıyır. Azərbaycandan olan tələbələr xaricdə təhsil üçün ən çox Türkiyə universitetlərini seçirlər. Türkiyədə tibbi təhsil sahəsində də uğurlu və müasir kadr hazırlığı həyata keçirilir. Burada yalnız təhsil mübadiləsi deyil, eyni zamanda tələbə və elmi əməkdaşlıq istiqamətində əlaqələrin genişləndirilməsi hər iki ölkə üçün faydalı ola bilər. Bu baxımdan, deputat Siyavuş Novruzovun irəli sürdüyü təklifi yüksək qiymətləndirirəm. Hesab edirəm ki, bu təşəbbüs ölkəmizin təhsil sisteminə və keyfiyyətli kadr hazırlığına mühüm töhfə verə bilər”.
16:35 23.12.2025
Oxunuş sayı: 1128
