Qareginin qardaşı sovet DTK-sı ilə əməkdaşlıq edib
Ermənistan Milli Təhlükəsizlik Xidməti bildirib ki, Erməni Apostol Kilsəsinin rəhbəri Katalikos II Qareginin qardaşı Mkrtıç (Ezras) Nersisyan sovet dövründə DTK tərəfindən əməkdaşlığa cəlb olunub və "Karo" ləqəbi ilə fəaliyyət göstərib.
Crossmedia.az xarici mediaya istinadən xəbər verir ki, Milli Təhlükəsizlik Xidmətinin məlumatına görə, arxiyepiskop Ezras Nersisyan 1986–1988-ci illərdə SSRİ DTK-sı ilə əməkdaşlıq edib. Qurum qeyd edir ki, mövcud məlumatlar onun hazırda da xarici dövlətlərin xüsusi xidmət orqanlarının nümayəndələri ilə əlaqələr saxladığını göstərir.
Açıqlamada vurğulanır ki, bu cür əlaqələr Ermənistan Respublikasının təhlükəsizliyi və milli maraqları üçün potensial təhdid yarada bilər. Bu səbəbdən Milli Təhlükəsizlik Xidməti qanunvericiliklə müəyyən edilmiş səlahiyyətlər çərçivəsində qeyd olunan risklərin aradan qaldırılması istiqamətində zəruri tədbirlər həyata keçirir.
Milli Təhlükəsizlik Xidmətinin yaydığı məlumatda, həmçinin arxiyepiskop Ezras Nersisyanın sovet DTK-sı ilə əməkdaşlıq etməsini təsdiqləyən məxfilikdən çıxarılmış sənədin nümunəsinin də təqdim olunduğu bildirilir.
Nigar Yahyazadə
17:06 19.12.2025
Oxunuş sayı: 1076
