Rəşad Dağlı vaxtından əvvəl azadlığa buraxıla bilər?- Hüquqşünas açıqladı
Ötən günlərdə dövlət başçısı tərəfindən imzalanan amnistiya sərəncamı cəmiyyətdə geniş müzakirələrə səbəb olub. Humanist mahiyyət daşıyan bu qərar minlərlə məhkum və onların ailələri üçün ümid mənbəyinə çevrildiyi kimi, ictimaiyyətin diqqətini konkret şəxslərin azadlığa buraxılması ehtimalına da yönəldib. Bu kontekstdə, hazırda cəza çəkən tanınmış meyxanaçı Rəşad Dağlının amnistiya aktına düşüb-düşməyəcəyi və onun azad olunma perspektivləri xüsusi maraq doğurur. Hüquqi çərçivə və amnistiya şərtləri fonunda Rəşad Dağlının taleyi ilə bağlı suallar ictimai gündəmin əsas mövzularından birinə çevrilib.
Bu barədə Crossmedia.az-a danışan hüquqşünas Ramil Süleymanov deyib ki, qanunvericiliyə əsasən, Prezidentin imzaladığı amnistiya aktında və sərəncamda da açıq şəkildə göstərildiyi kimi, amnistiya ağır və xüsusilə ağır cinayətlər törətmiş şəxslərə şamil edilmir. Bu baxımdan, qəsdən adam öldürmə maddəsi ilə təqsirləndirilən meyxanaçı Rəşad Dağlıya da amnistiya aktının tətbiqi mümkün olmayacaq: "Sözügedən şəxsə 9 il 6 ay müddətinə azadlıqdan məhrumetmə cəzası təyin edildiyindən, bu cinayət ağır cinayətlər kateqoriyasına aid olunur və həmin səbəbdən amnistiya sərəncamının əhatə dairəsinə daxil deyil. Bununla belə, ümumilikdə amnistiya təşəbbüsü və qəbul edilmiş amnistiya sərəncamı müsbət xarakterizə olunmalı və müsbət qiymətləndirilməlidir. Hesab edirəm ki, hazırkı şəraitdə cəza çəkən şəxslərin bir qisminin azadlığa buraxılması onların islah olunması istiqamətində mühüm addımdır. Eyni zamanda, iqtisadi vəziyyətin mürəkkəbləşdiyi və ya pisləşmə ehtimalının mövcud olduğu bir dövrdə hər bir məhkumun saxlanılması üçün dövlət büdcəsindən gündəlik vəsait ayrılmasının qarşısının alınması baxımından da bu qərar əhəmiyyətlidir. Nəzərə almaq lazımdır ki, hazırda ölkədə ictimai təhlükəliliyi yüksək olmayan, az ağır və ya orta ağır cinayətlər törətmiş xeyli sayda şəxs cəza çəkir. Amnistiya onların cəmiyyətə reinteqrasiyasına şərait yaratmaqla yanaşı, gələcəkdə yenidən cinayət törətməkdən çəkindirici amil rolunu da oynaya bilər".
12:09 18.12.2025
Oxunuş sayı: 1144
