Gümrü merinin həbs müddətinin uzadılması tələb olunur
Ermənistan prokurorluğu Gümrü şəhərinin meri Vardan Qukasyanın həbs müddətinin daha 3 ay uzadılması ilə bağlı məhkəməyə müraciət edib.
Bu barədə Crossmedia.az xarici KİV-ə istinadən xəbər verir.
Prokuror hazırkı mərhələdə bu qətimkan tədbirinin qüvvədə saxlanılması üçün əsasların qalmaqda olduğunu bildirib.
Dövlət ittihamının mövqeyinə əsasən, Qukasyanın azadlıqda olması yeni cinayət törətməsi, eləcə də korrupsiya işi üzrə şahidlərə və digər proses iştirakçılarına təzyiq göstərməsi riskini artırır. Bu səbəbdən onun barəsində seçilmiş həbs qətimkan tədbirinin uzadılması zəruri hesab olunur.
Müdafiə tərəfi isə məhkəməyə həbsin ləğvi ilə bağlı vəsatətlər təqdim edib. Vəkillər bildiriblər ki, seçilmiş qətimkan tədbiri merin səhhəti ilə uzlaşmır və bu hal nəzərə alınmalıdır.
Qeyd edək ki, Vardan Qukasyan Ermənistan Respublikasının Cinayət Məcəlləsinin “rüşvət alma” maddəsi ilə ittiham olunur. O, irəli sürülən ittihamları qəbul etmir.
Türkanə Məşədiyeva
16:52 17.12.2025
Oxunuş sayı: 1247
