Ermənistan parlamenti Xarici Əks-Kəşfiyyat Xidmətinin yaradılmasını təsdiqlədi
Ermənistan Milli Assambleyası Xarici Əks-Kəşfiyyat Xidmətinin yaradılmasını nəzərdə tutan qanun dəyişikliklərini qəbul edib. Ermənistan KİV-inin məlumatına görə, “Milli təhlükəsizlik orqanları haqqında” qanuna edilən dəyişikliklər bu gün parlamentdə ikinci və yekun oxunuşda təsdiqlənib.
Crossmedia.az xəbər verir ki,qanun layihəsinin qəbul edilməsi ölkənin təhlükəsizlik sistemində aparılan struktur islahatları ilə bağlıdır. Bildirilir ki, 2022-ci ilin dekabrında yaradılmış Xarici Kəşfiyyat Xidməti ilə Milli Təhlükəsizlik Xidməti arasında səlahiyyət və funksiyaların daha dəqiq bölüşdürülməsi məqsədilə yeni qurumun təsis edilməsi zəruri hesab olunub.
Yeni yaradılacaq Xarici Əks-Kəşfiyyat Xidməti xarici xüsusi xidmət orqanlarının fəaliyyəti, kəşfiyyat və təsir cəhdlərinin qarşısının alınması, eləcə də milli təhlükəsizliyə yönələn risklərin neytrallaşdırılması ilə məşğul olacaq. Rəsmi dairələrin bildirdiyinə görə, bu addım təhlükəsizlik strukturlarının fəaliyyətinin daha effektiv və çevik təşkilinə imkan verəcək.
Qanun dəyişiklikləri qüvvəyə mindikdən sonra yeni xidmətin strukturunun, səlahiyyətlərinin və fəaliyyət mexanizmlərinin ayrıca normativ sənədlərlə tənzimlənəcəyi gözlənilir.
Nastya Qəniyeva
15:33 17.12.2025
Oxunuş sayı: 683
