Rusiya aktivləri ətrafında yeni risk: Aİ Belçikanın razılığı olmadan qərar verə bilər
Avropa İttifaqı Ukraynanın maliyyələşdirilməsi məqsədilə dondurulmuş Rusiya aktivlərindən Belçikanın razılığı olmadan istifadə etmək variantını nəzərdən keçirə bilər.
Crossmedia.az Politico nəşrinə istinadən xəbər verir. Bildirilir ki, məsələ üzrə Aİ daxilində konsensus əldə olunmasa belə, qərarın ixtisaslı səs çoxluğu mexanizmi ilə qəbul edilməsi ehtimalı istisna edilmir.
Latviyanın baş naziri Evika Silinya Politicoya açıqlamasında bildirib ki, Belçikanın bu prosesdə iştirakı vacibdir, lakin alternativ variantlar da gündəmdə qala bilər.
“Belçikanın razılığı önəmlidir, amma baxaq. Əgər yeganə çıxış yolu ixtisaslı səs çoxluğu olarsa, niyə də yox?” – deyə o qeyd edib.
Diplomatik dairələrdəki mənbələr isə bu yanaşmaya ehtiyatla yanaşılmasının vacibliyini vurğulayırlar. Onların fikrincə, Belçikanın mövqeyinin kənarda qalması artıq daxili ziddiyyətlərlə üzləşən Avropa İttifaqında parçalanmanı daha da dərinləşdirə və qurumu ciddi siyasi böhrana sürükləyə bilər.
Qeyd edək ki, Rusiya aktivlərinin Ukraynanın maliyyələşdirilməsi üçün istifadəsi məsələsi son dövrlərdə Aİ daxilində ən mübahisəli mövzulardan biri olaraq qalır və üzv dövlətlər arasında ciddi fikir ayrılıqlarına səbəb olur.
Sevinc Yarməmmədova
14:10 17.12.2025
Oxunuş sayı: 880
