Hadisə

Londonda Azərbaycanın enerji təhlükəsizliyinə töhfələri müzakirə olunub

Londonda Xəzər Siyasət Mərkəzinin III London enerji təhlükəsizliyi konfransı keçirilib.

Crossmedia.az xəbər verir ki, “Enerji təhlükəsizliyi: yeni reallıqlar” mövzulu konfransın ilk panelində region ölkələrinin Britaniyadakı səfirləri və diplomatları çıxış ediblər.

Xəzər Siyasət Mərkəzinin direktoru Əfqan Nifti Cənubi Qafqazda və Xəzər hövzəsində son bir ildə müşahidə olunan geosiyasi, iqtisadi və enerji yönlü dəyişikliklərin strateji əhəmiyyətindən danışıb. Bildirib ki, bu il region üçün xüsusilə dinamik dövr olub. Əfqan Nifti ilk növbədə Vaşinqtonda təşkil olunan C5+1 Sammitindən, ABŞ Prezidenti Donald Trampın Mərkəzi Asiya ölkələrinin liderlərini qəbul etməsi və ardınca Azərbaycanın bu formata qoşularaq C6 mexanizminin yaradılmasından danışıb.

Onun sözlərinə görə, Mərkəzi Asiya ilə Cənubi Qafqaz arasında inteqrasiya və əlaqələr yeni mərhələyə keçir. Qeyd edib ki, bu addım həm regional siyasi koordinasiyanın, həm də iqtisadi əməkdaşlığın güclənməsinə xidmət edəcək.

Əfqan Nifti regionun təkcə ənənəvi enerji resursları ilə deyil, həm də geniş bərpaolunan enerji imkanları ilə diqqət çəkdiyini deyib. O, Azərbaycan, Qazaxıstan və Özbəkistan arasında yaradılan “Yaşıl Enerji Dəhlizi” təşəbbüsünü xüsusilə vurğulayıb. Direktor Ermənistan və Azərbaycan arasında ABŞ-ın dəstəyi ilə əldə edilən razılaşmanı region üçün dönüş nöqtəsi kimi qiymətləndirib: “Bu razılaşma yalnız siyasi sabitlik baxımından deyil, həm də Cənubi Qafqazda yeni nəqliyyat və iqtisadi layihələr üçün zəmin yaratması ilə əhəmiyyətlidir”.

Azərbaycanın Britaniyadakı səfirliyinin müşaviri Günel Səlimova ölkəmizin Avropanın enerji təhlükəsizliyinə töhfələrindən, Cənub Qaz Dəhlizinin strateji əhəmiyyətindən bəhs edib. O, Azərbaycanın regionda alternativ enerji üzrə liderə çevrilməsi və bu xüsusda ölkəmizin iştirak etdiyi layihələrə də diqqət çəkib.

Azərbaycanın iqlim fəaliyyətinə töhfələrindən, COP29-da əldə edilmiş uğurlardan da danışan diplomat Vaşinqton görüşünün əhəmiyyətinə də toxunub. O, sülhün möhkəmləndirilməsi üçün regional bağlantı layihələrinin tezliklə reallaşmasının vacibliyinə diqqət çəkib, avropalı və britaniyalı tərəfdaşların da bu layihələri dəstəkləməsinin arzuolunan olduğunu söyləyib. Ölkəmizin C6 formatına qoşulmasının siyasi və iqtisadi əhəmiyyəti vurğulanıb.

Tədbirin ekspert panellərində Böyük Britaniyanın sabiq enerji və iqlim dəyişikliyi naziri, Böyük Britaniyanın Baş nazirinin Azərbaycan, Qazaxıstan və Türkmənistan üzrə sabiq ticarət elçisi Çarlz Hendri, Avropa Yenidənqurma və İnkişaf Bankı (AYİB), “Methinks”, “Nefte Compass” kimi təşkilat, şirkət və araşdırma mərkəzlərinin mütəxəssisləri təqdimat edib.

Ekspertlər hazırkı ziddiyyətli geosiyasi reallıqlarda Azərbaycanın təbii qaz və alternativ enerji potensialının növbəti onilliklərdə enerji təhlükəsizliyinin təmin edilməsi baxımından vacib olacağını qeyd ediblər, regional əməkdaşlığın əhəmiyyətini vurğulayıblar.(AZƏRTAC)