İqtisadçı açıqladı - Ağıllı saatdan sonra bu məhsullara da vergi qoyulacaq
Ağıllı saatların mobil cihazlar kateqoriyasına daxil edilməsi və hər birinə 20 manat aksiz vergisinin tətbiqi məsələsi yeni müzakirələrə yol açıb. Texnologiyanın sürətlə inkişaf etdiyi, ağıllı cihazların gündəlik həyatımızın ayrılmaz hissəsinə çevrildiyi bir dövrdə bu cür məhsulların əlavə vergi yükünə cəlb edilməsi diqqət çəkir. Bir tərəfdən dövlət büdcə gəlirlərinin artırılması və qeyri-neft sektorundan daxilolmaların genişləndirilməsini hədəfləyir, digər tərəfdən isə belə addımların istehlakçılara təsiri sual doğurur.
Bəs texnoloji avadanlıqların bu şəkildə aksiz vergisinə cəlb edilməsi nə dərəcədə əsaslıdır?
Mövzu ilə bağlı iqtisadçı Xalid Kərimli Crossmedia.az-a açıqlamasında qeyd edib ki, ağıllı saat lüks istehlak məhsulu hesab olunur: “Dövlətə isə gəlir lazımdır. Rəsmi səviyyədə dəfələrlə vurğulanır ki, Azərbaycan neftdən asılılığı azaltmalıdır. Bu asılılığın azaldılmasının yollarından biri də dövlət büdcəsinin neft gəlirlərindən asılılığını minimuma endirməkdir”.
İqtisadçı qeyd edib ki, dövlət büdcəyə vəsaiti haradan cəlb etməlidir? “Dövlətin üçüncü bir gəlir mənbəyi yoxdur. Uzun müddət vergilərin nisbətən aşağı olduğu dövrdə dövlətin əsas gəlir mənbəyi neft gəlirləri idi. İndi isə neftdən asılılığın azaldılması istiqamətində vergi siyasəti ön plana çıxır. Hədəf ondan ibarətdir ki, dövlət gəlirlərinin təxminən 75 faizi vergilər hesabına formalaşsın. Bu baxımdan, belə istehlak məhsullarına vergilərin tətbiqi bundan sonra da gündəmə gələcək. Aldığımız ərzaq məhsullarından tutmuş digər gündəlik istehlak mallarına qədər müxtəlif məhsullara vergi tətbiq olunur. Görünən odur ki, bu vergilərin əhatə dairəsi və həcmi zamanla daha da genişlənə bilər”.
Ayhan
15:30 06.11.2026
Oxunuş sayı: 54
