Hemofiliya xəstələrinin dərman təminatı ilə bağlı təklif irəli sürülüb
İrsi qan xəstəliyi olan hemofiliya üçün Əvəzedici Faktor Preparatlarının regionlara çatdırılması təşkil edilməyib.
Crossmedia.az xəbər verir ki, bunu Milli Məclisin Səhiyyə komitəsinin üzvü Pərvanə Vəliyeva parlamentin Təbii ehtiyatlar, energetika və ekologiya, Əmək və sosial siyasət, Səhiyyə, Beynəlxalq münasibətlər və parlamentlərarası əlaqələr komitələrinin birgə iclasında 2027-ci il dövlət büdcəsi layihəsinin müzakirəsi zamanı deyib.
O qeyd edib ki, hələ də pasiyentlər ayda 2 dəfə rayonlardan Bakıya gələrək dərmanlarını alır:
"Şəmkirdə yaşayan bir xəstə ildə 27 dəfə Bakıya gəlib-getməli olur, bu isə 27 min km deməkdir. Bu administrativ bir çətinlik olsa da, artıq bir neçə ildir ki, problem davam edir. Təklifim ondan ibarətdir ki, bu dərmanlar ən yaxşı halda, rayon mərkəzi xəstəxanalarına aylıq olaraq çatdırılsın".
Deputat həmçinin vurğulayıb ki, regionlarda ilkin səhiyyə xidmətinin əlçatanlığının təmin edilməsi məqsədilə modul tipli kənd həkim, kənd tibb məntəqələrinin quraşdırılması vacibdir:
"Pandemiya zamanı alınmış bu konstruksiyaların səmərəli istifadəsi üçün yararlı olardı.
Bununla yanaşı, son aparılan islahatlardan sonra Səhiyyə Nazirliyinin tabeliyində olan tibb müəssisələri ilə TƏBİB tabeli müəssisələr arasında işçilərin əmək haqqı üzrə disbalansın aradan qaldırılması da məqsədəuyğun olardı".(Report)
13:05 06.11.2026
Oxunuş sayı: 71
