Aşqabadda Xəzər dənizinin su bioresurslarının qorunması üzrə 9-cu iclas keçirilib
24–26 noyabr 2025-ci il tarixlərində Aşqabad şəhərində Xəzər dənizinin su bioresurslarının qorunması, rasional istifadəsi və birgə ehtiyatların idarə olunması üzrə Komissiyanın 9-cu iclası keçirilib.
Crossmedia.az xəbər verir ki, iclasda Azərbaycanı Kənd Təsərrüfatı Nazirliyinin tabeliyində “Balıqçılıq və Akvakultura Mərkəzi”nin direktoru Ceyhun Əliyev və müavini Elşən Məcidov təmsil edib. Həmçinin İran, Qazaxıstan, Rusiya və Türkmənistanın nümayəndə heyətləri iştirak edib.
Tərəflər əvvəlki qərarların icrası, 2024-cü ildə istifadə olunmuş balıqçılıq kvotaları, ehtiyatların bərpası və su bioresurslarının mühafizəsi ilə bağlı görülmüş tədbirləri müzakirə ediblər. Elmi tədqiqat məlumatlarına əsaslanaraq Xəzər dənizində su bioresurslarının vəziyyəti qiymətləndirilib, 2026-cı il üçün birgə balıqçılıq kvotaları təsdiqlənib.
Azərbaycan nümayəndə heyəti elmi tədqiqatların koordinasiyasının gücləndirilməsi, biomonitorinq sistemlərinin təkmilləşdirilməsi və nərə balıqlarının bərpa proqramlarının genişləndirilməsinin vacibliyini vurğulayıb. İclasın yekun protokolu imzalanıb.
13:22 28.11.2025
Oxunuş sayı: 1294
