Müsahibə qalibi: "Yüksəliş sadəcə bir sınaqdır və bundan qorxmağa dəyməz" - MÜSAHİBƏ

Artıq bir neçə ildir həyata keçirilən “Yüksəliş” müsabiqəsi ölkədə böyük maraq doğuran və yaxından izlənən nüfuzlu bir layihəyə çevrilib. Proqramın əsas məqsədi istedadlı və perspektivli kadrları müəyyənləşdirərək onların bilik və bacarıqlarına uyğun olaraq daha yüksək vəzifələrə irəli çəkilməsini təmin etməkdir. Bu, dövlətin peşəkar və inkişaf yönümlü gənclərə verdiyi dəyərin real göstəricisidir. Müsabiqənin əvvəlki illər qaliblərinin bu gün müxtəlif sahələrdə yüksək məsuliyyətli vəzifələrdə çalışması “Yüksəliş”in praktiki nəticələrinin ən bariz sübutudur. Layihə yalnız idarəetmə sahəsinə yeni nəfəs gətirmir, eyni zamanda etibarlı və peşəkar kadr ehtiyatının formalaşmasına mühüm töhfə verir. Hər il onlarla bacarıqlı, motivasiyalı gəncin aşkara çıxması, onların inkişafına yeni fürsətlər açılması bu proqramın nə qədər strateji əhəmiyyət daşıdığını bir daha göstərir.

Bu dəfəki müsahibimiz IV “Yüksəliş”müsabiqəsinin qaliblərindən  Şəfəq Həsənalizadədədir. Həmin müsahibəni təqdim edirik:

— İlk sualımız belədir: "Yüksəliş" müsahibəsində iştirak etmək sizdə hansı daxili motivasiyadan doğdu? Şəxsi inkişaf arzusu, rəqabət ruhu, yoxsa cəmiyyətə fayda vermək istəyi?

— Ümumiyyətlə belə deyərdim ki, uşaqlıqdan rəqabətli mühitlərdə olmağı sevmişəm. Bəlkə də, tam doğru yanaşma deyil, amma hər birimizin uşaqlığında özümüzü hansısa yaşıdımızla müqayisə etdiyimiz dövrlər olur. Mənim ailəmdə də belə hallar yaşanıb və bunun nəticəsində həmişə özümlə yalnız özümlə daxili rəqabət aparmışam. Bu gün belədirsə, sabah mütləq daha yaxşı olmalıyam düşüncəsi məndə hər zaman olub. Motivasiyam isə, yəqin ki, müsabiqənin əvvəlki qaliblərini gördükdən sonra daha da formalaşdı. Düşündüm ki, mən də özümü sınayım, görüm, hara qədər irəliləyə bilərəm. İlk mərhələlər mənə bir növ oyun kimi gəlirdi: “Növbəti mərhələdə nə olacaq?”, “Özümü necə göstərəcəyəm?” Bu suallar insanda daxilən maraq və həyəcan yaradır. Fikrimcə, "Yüksəliş" müsabiqəsində iştirak etmək mənim özümlə imtahanım idi. Özümü özümə sübut etməyin bir yolu kimi baxırdım. İnsanın içində hər zaman özünə qarşı bir inam olur, lakin bu inam nəticə ilə sübut olunanda insanın həm gələcəyə baxışı, həm də motivasiyası dəyişir. Mənim üçün də belə oldu. Qeyd edim ki, "Yüksəlişə" iki dəfə müraciət etmişəm. İlk dəfə finala qədər yüksəldim. Lakin ikinci dəfə artıq konkret məqsədim vardı: qalib olmaq. Özümə qoyduğum bu hədəfə də çatdım.

— Müsabiqənin hansı mərhələsi sizə özünüzü daha yaxından tanımaq imkanı verdi? Hansı mərhələdən sonra özünüzü kəşf etdiyinizi düşündünüz?

— Özümü daha yaxından kəşf etdiyim mərhələ məhz final oldu. Yarımfinal və final mərhələləri ümumilikdə təsirli idi, lakin final tamam fərqli atmosfer idi. İlkin mərhələlər daha çox dünya görüşü, məntiq, idarəetmə kimi illərlə formalaşan biliklərin yoxlanıldığı sınaqlar idi.

Final isə həm daxili bacarıqları, həm də şəxsi keyfiyyətləri üzə çıxaran mərhələdir. Bu mərhələ təkcə individual deyil, komandada və rəqabətli mühitdə özünü göstərmək imkanı yaradırdı. Mən maliyyə sahəsinin nümayəndəsiyəm və illərdir Dövlət Gömrük Komitəsinin strukturunda çalışıram. Bu işin müəyyən sərhədləri var. Lakin final mərhələsi mənə həmin sərhədləri aşaraq özümü tamamilə başqa sahələrdə, fərqli perspektivdən tanımaq imkanı verdi.

— "Yüksəliş" təkcə yarış deyil, həm də öyrənmə mühitidir. Siz bu mühitdən hansı yeni bacarıqları və düşüncə tərzini qazandınız?

— Əslində "Yüksəliş"qalibiyyətdən kənar olaraq, insanları tanımaq və güclü networking formalaşdırmaq baxımından əvəzolunmaz platformadır. Orada insan istər-istəməz elə bacarıqlar əldə edir ki, onları nə kitabdan oxumaq, nə də başqa yerdə öyrənmək olur. Siz insanları müşahidə etdikcə, davranışlarından və yanaşmalarından nümunələr götürdükcə davamlı şəkildə inkişaf edirsiniz. Müsabiqədən sonra bir çox məsələlərə baxış bucağım dəyişdi. İnsanlarla ünsiyyətdə olmaq, müxtəlif xarakter və düşüncələri analiz etmək mənim üçün yeni imkanlar yaratdı. Hər tanıdığım insan mənim üçün yeni bir dərs, yeni bir inkişaf xətti oldu.

— Müsabiqə müddətində sizi ən çox təəccübləndirən və ya gözləmədiyiniz hansı məqam oldu?

— Məni ən çox təəccübləndirən məqamlardan biri insanların qadınların qalib gəlməsi ilə bağlı stereotipləri idi. Çox vaxt düşünürlər ki, xanımsansa, qadınlar arasında daha rahat fərqlənə bilərsən və ya hansısa pozitiv diskriminasiya var. Halbuki biz ilkin mərhələdən finala qədər hamımız eyni sınaqlardan keçmişdik. Bizim ilimizdə qaliblər arasında xanımların sayı çox az idi cəmi iki nəfər idik. Bu da bir daha göstərdi ki, "Yüksəlişdə" nə gender üstünlüyü var, nə də xüsusi kvota. Kim layiqdirsə, kim sübut edirsə, o da qalib olur. Məhz bu məqam mənim üçün ən təəccüblü, eyni zamanda ən sevindirici olandı.

— Bu təcrübə sizin liderliyə, komanda işinə və idarəetməyə baxışınızı necə dəyişdi?

— Tam olaraq “dəyişdi” deməzdim. Mənim liderlik anlayışım əvvəldən kollektivə açıq, dəyişikliyə hazır, daim dəstək göstərən bir üsluba əsaslanırdı. Bürokratik liderlik heç vaxt mənə yaxın olmayıb. Lakin "Yüksəliş”dən sonra praktik liderlik yanaşmalarımın üzərinə daha çox nəzəri bilik əlavə etməyə başladım. Yəni, daxili liderlik instinktimi nəzəri metodlarla birləşdirməyə çalışıram. Bu isə həm özümü, həm də komandanı daha düzgün yönləndirməyə kömək edir.

— Əgər "Yüksəliş" müsabiqəsinin konsepsiyasına bir yenilik əlavə etmək imkanınız olsaydı, bu nə olardı və niyə?

— Düşünürəm ki, "Yüksəliş" konsepsiyası olduqca ideal qurulub. Hər bir mərhələ insanı fərqli tərəflərdən yoxlayır: həm biliklər, həm şəxsi keyfiyyətlər, həm də rəhbərlik bacarıqları. Lakin mümkün olsa, müsabiqənin daha geniş auditoriyanı əhatə etməsini arzulayardım. Məsələn, Rusiyada “Lideri Rossii” layihəsində ixtisaslara uyğun ayrıca istiqamətlər olur. Bu, müxtəlif sahələrdən olan insanların öz potensialını daha dəqiq nümayiş etdirməsinə şərait yaradır. Azərbaycanda da gələcəkdə belə ixtisaslaşdırılmış kateqoriyaların tətbiqi iştirakçı sayı və müxtəlifliyi baxımından faydalı ola bilərdi.

— Müsabiqədə iştirak etməyə tərəddüd edən gənclərə bir cümlə ilə nə demək istərdiniz?

— "Yüksəliş" sadəcə bir sınaqdır, qorxmağa dəyməz itirəcəyiniz heç nə yoxdur, amma qazanacağınız çox şey var. Əlavə olaraq qeyd etmək istəyirəm ki, uğursuzluqdan qorxmaq lazım deyil. Bir dəfə alınmaz, iki dəfə alınmaz, amma dördüncü dəfə mütləq alınar. Toma Edisonun yüzlərlə cəhddən sonra kəşfə nail olduğunu unutmayaq. "Yüksəlişdə" də belədir: qalib olmaq üçün gərək cəhd etməkdən yorulmayasan.

— "Yüksəliş" sizin üçün bir mərhələ idi. Bəs növbəti yüksəlişiniz nə olacaq?

— Bu sual bir qədər çətindir. Əlbəttə ki, növbəti yüksəlişim olacaq, buna inanıram. Lakin bu yüksəlişin hansı sahədə və hansı formada olacağını indidən dəqiq deyə bilmirəm. Bunun üçün üzərimdə işləməyə, bilik və bacarıqlarımı artırmağa davam edirəm. Düşünürəm ki, insan dayandığı an geriləməyə başlayır, ona görə də davamlı inkişaf əsas prioritetimdir.

Elmir Heydərli