Ankara İrəvanla münasibətləri normallaşdırır: Azərbaycan prosesi diqqətlə izləyir
Türkiyə Ermənistanla münasibətlərin normallaşdırılması istiqamətində müxtəlif səviyyələrdə dialoqu davam etdirir. Ankara və İrəvan arasında konkret addımlar üzərində aparılan işlər regionda sabitliyin gücləndirilməsi və əməkdaşlıq imkanlarının genişləndirilməsi baxımından böyük əhəmiyyət kəsb edir. Nazir Hakan Fidan parlamentdə bildirib ki, İrəvan açıq mövqe nümayiş etdirir və hər iki tərəf bu dialoqun effektiv və nəticəyönümlü olması üçün birgə çalışır. Bu proses yalnız iki ölkə üçün deyil, həm də regional iqtisadi, nəqliyyat və təhlükəsizlik layihələrinin icrası baxımından strateji əhəmiyyət daşıyır. Eyni zamanda, dialoqlar Azərbaycanla Türkiyə arasındakı münasibətlərin sinxronlaşdırılması prinsipi əsasında aparılır ki, bu da bölgədə sabitliyin qorunması və geosiyasi balansın təmin olunması üçün vacibdir.
Mövzu ilə bağlı Crossmedia.az-a açıqlamasında politoloq Məhəmməd Cəbrayılov bildirib ki, bu, fundamental və ciddi irəliləyiş olmasa da, Ankara–İrəvan münasibətlərində müəyyən irəliləyiş kimi qiymətləndirilə bilər: "Son aylarda Ermənistan həm Qərblə, həm də region dövlətləri ilə çoxvektorlu diplomatiya görüntüsü yaratmağa çalışır. Bu həm Avropa İttifaqına inteqrasiya məsələsi, həm ABŞ–Ermənistan münasibətləri, həm də KTMT-dən uzaqlaşma cəhdlərini əhatə edir. Eyni zamanda, Ermənistan sərhəd delimitasiyası prosesində nisbi konstruktivlik nümayiş etdirərək xarici siyasət gündəmini formalaşdırır".
M. Cəbrayılov vurğulayıb ki, Türkiyə prosesdə müəyyən texniki addımların həyata keçirilməsinə baxmayaraq, fundamental dönüşüm hələ baş verməyib: "Ən önəmlisi isə Ankara prosesi Bakı ilə sinxronlaşdırmaq prinsipinə sadiq qalır. Türkiyə həmişə rəsmi İrəvanla münasibətləri tənzimləyərkən rəsmi Bakı ilə məsləhətləşmələr aparıb. Ötən 30 ildə də bunu görmüşük. Ermənistanın Qarabağı işğal altında saxladığı dövrdə də Türkiyə Bakı ilə koordinasiyanı prioritet hesab edib”.
Politoloq əlavə edib ki, Ermənistanın son dövrdə Türkiyə ilə dialoqu, həmçinin 8 avqust üçtərəfli bəyannaməsi çərçivəsində götürülmüş öhdəliklərin icrası baxımından da konstruktiv əlamətlər göstərir: “Rəsmi İrəvan Paşinyan başda olmaqla həm Türkiyə, həm də Azərbaycanla münasibətlərin normallaşması istiqamətində müəyyən cəhdlər edir. Bu, regionda yeni nəqliyyat və təhlükəsizlik arxitekturası üçün zəruridir. Zəngəzur dəhlizi və sərhədlərin açılması məsələlərində iqtisadi inteqrasiya üçün praqmatik davranışlar ortaya çıxır və Ermənistanı destruktiv mövqedən çəkindirir”.
M. Cəbrayılovun sözlərinə görə, Ankara–İrəvan dialoqu Azərbaycanın geosiyasi manevr imkanlarını genişləndirir:
"Ermənistan Qərb üçün bölgədə əsas tərəfdaşın Bakı olduğunu görür və Türkiyə diplomatik vasitələrlə Ermənistana Azərbaycanın əhəmiyyətini başa salır. Bu, rəsmi Bakının tələblərinin yerinə yetirilməsinə kömək edir. Kommunikasiyaların açılmasından Vaşinqton bəyannaməsinə qədər bütün öhdəliklər Türkiyə kanalları vasitəsilə dəstəklənir.”
Politoloq yekun olaraq vurğulayıb ki, rəsmi Bakı ilə koordinasiyalı diplomatiya sayəsində Ankara–İrəvan dialoqu Azərbaycanın maraqlarına uyğun şəkildə aparılır və regionda sabitliyin təmin olunmasına töhfə verir: "Rəsmi İrəvan və Ankara arasındakı danışıqlar Azərbaycanın mövqelərini zəiflətmir, əksinə daha da möhkəmləndirir. Türkiyə heç vaxt rəsmi Bakının mövqeyini nəzərə almadan İrəvanla danışıqlar aparmaz. Bu proses Azərbaycanın geosiyasi və diplomatik maraqlarına xidmət edir."
Nigar Yahyazadə
18:19 19.11.2025
Oxunuş sayı: 2873
