Qəzalı məktəblərin bərpası təhsilə dövlət qayğısının dövlət qayğısının ən ali səviyyədə təzahürür - RƏY
Elm və təhsil naziri Emin Əmrullayev bildirib ki, növbəti yeddi ildə qəzalı məktəb problemi tam həll ediləcək. Son illərdə təhsilə ayrılan vəsait xeyli artıb. Məktəblərin yenilənməsi və əsaslı təmiri davam etdirilir. Bu tədbirlər təhsil infrastrukturunun yaxşılaşdırılmasına xidmət edir. Yenilənmiş məktəblər şagirdlər üçün müasir və keyfiyyətli mühit yaradır.
Qəzalı məktəblərin aradan qaldırılması təhsilin keyfiyyətinə birbaşa təsir göstərir.
Bütün bu addımlar ölkədə təhsilə göstərilən dövlət qayğısının göstəricisidir.
Təhsil eksperti İlqar Orucov Crossmedia.az-a açıqlamasında bildirib ki, növbəti yeddi ildə qəzalı məktəb probleminin tamamilə həllinə hədəflənmiş işlər, təhsil infrastrukturunun yaxşılaşdırılmasından irəli gələn həllər və hədəflər kifayət qədər aydın görünür: "Bu istiqamətdə Azərbaycanda son illərdə xeyli işlər görülüb. Dövlət başçımızın sərəncamlarında yer alan yeni məktəblərin tikintisi və əsaslı təmiri, eyni zamanda Heydər Əliyev Fondunun prezidenti, Birinci vitse-prezident Mehriban Əliyevanın təşəbbüsü ilə həyata keçirilən "Yeniləşən Azərbaycanda Yeni Məktəb" layihəsi çərçivəsində ölkəmizdə indiyə kimi kifayət qədər işlər görülüb. Görünən odur ki, bu istiqamətdə işlər bundan sonra da davam etdiriləcək. Təhsil infrastrukturunun yenilənməsi təhsilin keyfiyyətinə təsir edən başlıca faktorlardandır".
Ekspert qeyd edib ki, Azərbaycanda son illərdə tikilən və əsaslı təmir olunan məktəblər həm də təhsilin keyfiyyətini yaxşılaşdırmağa yönəlmiş işlərdir: "Bu mənada qəzalı məktəblərin problemlərinin aradan qaldırılması və onların təmiri ilə bərabər, infrastruktur yenilənir və müasir yanaşmalar tətbiq edilir. Bu baxımdan, bunu təhsil naminə görülən işlərin davamı kimi görürəm. Eyni zamanda, ölkəmizdə təhsilə göstərilən dövlət qayğısının ən ali səviyyədə təzahürü kimi qiymətləndirirəm. Azərbaycanda xeyli sayda qəzalı məktəb var. Bu məktəblərin hansı sırayla təmir olunması planlı şəkildə həyata keçirilir və cənab nazirin dediyi kimi, növbəti yeddi il ərzində bu məsələnin köklü həll olunması planlaşdırılır. Bu, kifayət qədər ümidverici və eyni zamanda təhsilyönümlü bir addımdır. Təhsilin inkişafında keyfiyyət dəyişiklikləri, şagirdlərin daha keyfiyyətli və müasir məktəblərdə təhsil alması çox vacib hadisədir. Bunun birbaşa təhsilin keyfiyyətinin artırılmasında rolu və əhəmiyyəti var".
Türkan Kərimli
16:03 13.11.2025
Oxunuş sayı: 1576
