Rusiya yanacaq böhranına qərq olub
Rusiya Ukraynanın neft emalı zavodlarına endirdiyi zərbələrin nəticələrini ən azı gələn ilin ortalarına qədər hiss edəcək.
Crossmedia.az xəbər verir ki, bu barədə “Bloomberg” agentliyinin istinad etdiyi Beynəlxalq Enerji Agentliyinin (BEA) yeni proqnozunda bildirilib.
BEA-nın məlumatına görə, Ukrayna pilotsuz uçuş aparatlarının hücumları Rusiyada neft emalının həcmini sutkada təxminən yarım milyon barel azaldıb. Nəticədə, ölkədə emal tempi 2026-cı ilin iyununa qədər gündəlik təxminən beş milyon barel səviyyəsində qalacaq. Bundan sonra isə yalnız tədricən bərpa prosesi gözlənilir – gündəlik 5,4 milyon barelə qədər artımla.
Sentyabr ayında emal olunmuş yanacağın ixracı cəmi 2,4 milyon barel təşkil edib ki, bu da son on ilin ən aşağı göstəricisidir (pandemiya dövrü olan 2020-ci ilin aprel ayı istisna olmaqla). İxracdakı azalmaları kompensasiya etmək üçün Moskva xam neft ixracını kəskin şəkildə artıraraq gündəlik 5,1 milyon barelə çatdırıb. Bu, 2023-cü ilin may ayından bəri qeydə alınan ən yüksək göstəricidir.
Lakin maliyyə balansı mənfi olub. Xam neft satışından gəlirlər 200 milyon dollar artsa da, emal olunmuş yanacaq ixracından gəlir 440 milyon dollar azalıb. Nəticədə Rusiyanın ümumi neft ixrac gəliri 13,4 milyard dollara enib ki, bu da son üç ayın minimum göstəricisidir.
“Bloomberg” qeyd edir ki, neft gəlirlərindəki azalma Rusiyanın dövlət büdcəsinə əlavə təzyiq yaradır.
Qeyd edək ki, yay aylarından etibarən Ukrayna Rusiyanın yanacaq-energetika obyektlərinə hücumları intensivləşdirib. Zərbələr artıq sistematik xarakter alıb – pilotsuz aparatlarla eyni neft emalı zavodları dəfələrlə hədəfə alınır, bu isə ciddi dağıntılar və yanacaq təchizatında fasilələrə səbəb olur.
14:39 14.10.2025
Oxunuş sayı: 1626
