Bəzi beynəlxalq səviyyələrdə hələ də Azərbaycana qarşı əsassız iddialar irəli sürülməkdədir - Açıqlama
Azərbaycanda cəza siyasətinin humanistləşdirilməsi
ilə bağlı daim islahatlar aparılır.
Bu sözləri Baş prokuror Kamran Əliyev
Avropa Şurasının Azərbaycanla bağlı hesabatı ilə bağlı sualı cavablandırarkən
deyib.
O, bu çərçivədə həm qunuvericiliyin təkmilləşdirildiyini,
həm də qanunvericiliyin tətbiqi ilə bağlı işlər görüldüyünü vurğulayıb.
Baş prokuror bildirib ki, Avropa
Şurasının hesabatlarında Azərbaycanla əlaqədar yer alan əsassız iddialara da
toxunub:
"Həmin hesabatlardakı bəzi məsələlərlə
razı deyilik. Hardakı biz özümüz problemləri görürük və bunun bağlı addımlar
atırıq. Bu istiqamətdə tədbirlər gələcəkdə də davam etdiriləcək"- deyə baş
prokuror qeyd edib.
Bəs maraqlıdır Azərbaycana qarşı belə əsassız
iddialar nədən qaynaqlanır?
Məsələ ilə bağlı Crossmedia.az-a
açıqlama verən hüquq müdafiəçisi Əliməmməd Nuriyev Azərbaycanda son illərdə öz
hüquq sistemində mühüm dəyişikliklər edildiyini
və bu prosesin hazırda davam etdirməklə Cəza siyasəti yumşaldılaraq alternativ
cəza tədbirlərinin tətbiq olunduğunu qeyd edib:
"Əfv və amnistiya aktları minlərlə
insana yeni şans verir. Bütün bunlar göz önündədir. Amma qəribədir ki, bəzi
beynəlxalq səviyyələrdə hələ də Azərbaycana qarşı “siyasi məhbus”, “işgəncə”,
“azadlıqların məhdudlaşdırılması” kimi iddialar irəli sürülür.
Onda sual yaranır: bu qədər real
islahatlar fonunda necə olur ki, eyni iddialar təkrar-təkrar gündəmə gətirilir?
Ən çox səsləndirilən ittihamlardan biri “siyasi məhbus” məsələsidir.
Amma gəlin açıq danışaq: bu termin
hüquqi deyil, siyasi xarakter daşıyan bir iddiadır. Hüquq qarşısında hamı bərabərdir
– qanunu pozan istənilən şəxs məsuliyyət daşıyır. Onun hansı partiyada, hansı təşkilatda
olması fərq etmir. Dövlətin qanunauyğun tədbirlərini “siyasi təqib” kimi təqdim
etmək hüquqa yox, siyasətə xidmət edir. Əgər bu yanaşmanı qəbul etsək, onda
dünyanın heç bir ölkəsində məhkəmə qərarını legitim saymaq olmaz.
Başqa bir tez-tez təkrarlanan iddia isə
saxlanılan şəxslərə işgəncə verilməsi ilə bağlıdır. Ancaq diqqətlə baxanda
görürük ki, bu iddiaların arxasında çox vaxt konkret sübut yoxdur: nə tibbi rəy,
nə məhkəmə qərarı, nə də müstəqil ekspert rəyi təqdim edilir.
Bəli, istisna edilmir ki, fərdi pozuntu
halları ola bilər. Heç bir dövlət orqanı bundan sığortalanmayıb. Amma Azərbaycanda
belə hallarla bağlı araşdırmalar aparılır, məsul şəxslər cəzalandırılır. Onu
sistem kimi təqdim etmək isə qərəzli yanaşmadır.
Avropa Şurası tez-tez bəyan edir ki,
guya Azərbaycan Avropa İnsan Hüquqları Məhkəməsinin qərarlarını icra etmir.
Amma sual yaranır: bəs Azərbaycan tərəfindən icra edilən onlarca qərar niyə
qeyd olunmur? Burada da qərəzin izləri görünür. Əgər obyektiv yanaşılmalı olsa,
həm icra edilən, həm də icrası vaxt tələb edən qərarlar nəzərə alınmalıdır. Bəzi
hallarda qərarların icrası üçün qanunvericilik dəyişiklikləri, yeni
institutların yaradılması və maliyyə məsələlərinin həlli tələb olunur. Bu isə
“icra olunmur” demək deyil.
Təəssüf ki, beynəlxalq sənədlərdə
tez-tez yalnız neqativ nümunələr qabardılır, müsbət faktorlar isə kölgədə
qalır.
Media və qeyri-hökumət təşkilatları ilə
bağlı da oxşar vəziyyət müşahidə olunur. Azərbaycanda onlarla qəzet, sayt,
televiziya kanalı, minlərlə ictimai birlik fəaliyyət göstərir. Sosial şəbəkələrdə
hər gün ən sərt tənqidlər səslənir. İnternet tam azaddır. Amma qanunu pozan,
maliyyə mənbələrini gizlədən, ictimai təhlükəsizlik üçün risk yaradan təşkilatlara
qarşı tədbir görülməsi məhdudiyyət kimi təqdim edilir ki, bu da düzgün deyil.
Dövlətin vəzifəsi yalnız özünü deyil, cəmiyyətin təhlükəsizliyini də
qorumaqdır".
Hüquq müdafiəçisi, həmçinin Azərbaycanın
fəallığı və diplomatik əlaqələri bəzən lobbist dairələrin çirkin kampaniyaları
altında gözdən salınmağa çalışıldığını bildirib: "Azərbaycan islahat
kursunu seçib və bundan geri dönməyəcək. Baş prokuror Kamran Əliyevin dediyi
kimi, biz problemləri görürük, addımlar atırıq və atmaqda davam edəcəyik. Amma əsassız
iddiaları qəbul etməyəcəyik. Çünki ədalət bir tərəfin dediyi ilə yox, həqiqətlə
ölçülür. Həqiqəti isə görmək istəməyənlərə nə desən də yetməz"- deyə o
qeyd edib.
Elmir Heydərli
21:43 01.10.2025
Oxunuş sayı: 4995
