Qırğızıstanda Azərbaycan dili kursları yeni dərs ilinə başlayıblar
Azərbaycan Respublikasının Diasporla İş üzrə Dövlət Komitəsinin dəstəyi və Qırğızıstan Azərbaycanlıları “Birlik” İctimai Birliyinin təşkilatçılığı ilə Bişkek şəhərində və Leninsk kəndində Azərbaycan dili kursları yeni dərs ilinə başlayıblar. Bununla yanaşı, Novonikolayevka kəndində də yeni kurslar açılıb. Kurslarda uşaqlara doğma dillərini dəstəkləyici və əlçatan mühitdə öyrənmək üçün şərait yaradılıb.
Crossmedia.az xəbər verir ki, Novonikolayevka kəndində kursların açılması layihənin coğrafiyasının genişlənməsi və daha çox soydaşımızın doğma dil mühitinə cəlb olunması baxımından mühüm addım kimi qiymətləndirilib.
Təşkilatçılar göstərilən dəstəyə görə Diasporla İş üzrə Dövlət Komitəsinə təşəkkürlərini bildirib, Azərbaycan diasporunun Vətənləri ilə əlaqələrinin möhkəmləndirilməsində bu kimi layihələrin əhəmiyyətini vurğulayıblar.
Belə təşəbbüslər xaricdə yaşayan azərbaycanlıların, o cümlədən uşaqların milli kimliyinin qorunması, Azərbaycan dilini öyrənməsi və tətbiqini genişləndirməsi, gənc nəslin Azərbaycan haqqında daha dərin biliklərə malik olması baxımından xüsusi önəm daşıyır.
14:36 24.09.2025
Oxunuş sayı: 897
